Electronic Arts (EA) chuan January ni 12 khan an game siam hlawhchham, Anthem server-te chu an titawp (shut down) fel ta a, hei hian game hi khelh theih lohin a siam a ni. Mahse, he game ngaina thartu thiamna nei hrang hrangte chuan nung leh tura siamthat tumin hna an thawk mek a. ‘The Fort’s Forge’ tia invuah, Discord group-a thawkkhawm volunteer engineer-te hian proof-of-concept video tawi te an tichhuak a, chutah chuan game hi tlem tlem loading screen thleng a lang thei tawh a ni. Mahse, he hna thawk mektute hian mipuite chu beisei sang lutuk lo turin an chah a, a chhan chu server thar siam chhuah hna chu an rin aiin a harsa zawk daih a ni.
He hna harsatna ber chu EA game engine hman thin, Frostbite engine vang a ni a. Anthem hian he engine hi EA game dangte hman dan lo ang deuhin a hmang a, chu chuan reverse-engineering thawk mektute a tibuai hle. Lead engineer pakhat Ness199X chuan Anthem hian service pawimawh pathum—authentication atana Blaze server, player data vawngtu Bioware Online Services (BIGS), leh level loading vawngtu Frostbite multiplayer engine—a neih thu a sawi a. Chung zinga multiplayer engine client-server architecture hi Anthem-ah hian a bik riau a, hei hi hmachhawn harsa ber lai a ni.
Tun thleng hian hmasawnna tlem a awm tawh a, map tlem chu an load thei tawh a, mahse NPC (Non-Player Characters) emaw game chhunga hmelmate an lang thei lo thung. A chhan chu Anthem hian online data Bioware server-a awm thin kha a rinfel (rely) em em vang a ni a. Volunteer-te hian heng data-te hi local-a host thei turin game patch siam an tum a, mahse Frostbite version hrang hrang leh Anthem-a a hman dan danglamna hian hna a tithuanawp thin. Tunah hian map loading thleng chauh hi an la hlawhtlin hmel a ni.
Heti chung hian Ness199X chuan hlawhtlinna chance hi 75% vel a nih a rin thu a sawi a. Thla tlemte hnuah emaw, a aia hma pawhin playable version tlem chu an tichhuak thei maithei niin a lang. Mahse, he hna hi mimal inpekna (volunteer) a nih avangin leh engineer-te hian mahni nitin hna an neih ve hlawm avangin, mipui lam pawh hmanhmawh lo turin an chah a ni. ‘The Fort’s Forge’ team-te hi tlem hle mah se, hmasawnna hmunhma an neih that deuh hnuah coder dang pawh lak belh an tum hmel a ni.