Apple chuan an thil zawnna hmanrua hmingthang tak, AirTag chu a vawi hnihna atan a thar a rawn tlangzarh ta a, ‘new AirTag’ tiin an vuah. He hmanrua thar hi a hmasa aiin a ṭha zawk tih sawi a ni a, a bik takin Bluetooth chip thar a hman avangin thil bo zawn hmuh nan a rintlâk zawk hle dawn a ni. AirTag hmasa kha kum nga zet a lo ni tawh a, vawiin thlengin khawvel hmun hrang hrangah mi tam takin an la hmang ṭangkai hle a ni.
AirTag hmasa-ah khan himna (privacy) lamah sawiselna tlem a lo awm tawh a, mi dang tracking leh stalking nana hman a nih ṭhin avangin Apple chuan he hmanrua thar-ah hian chutiang laka himna chu a ngaihtuah nasa hle. Apple chuan kum tam tak chhung features hrang hrang rawn tamin himna lam a lo ngaihtuah tawh a, tunah phei chuan a hmasa aiin hmasawnna lian zawk leh zawn hmuh awlsamna zawk a rawn thlen ta a ni.
He AirTag thar hian ‘second-generation Ultra Wideband chip’ a hmang a, hei hi iPhone 17-a an hman ang tho kha a ni. Apple-in a sawi dan chuan, Find My app-a ‘Precision Finding’ feature hmang hian thil bo chu hla tak aṭang pawhin a zawn hmuh theih tawh dawn a, a range (a thlen phak chin) hi za zela 50-in a zau zawk a ni. Hei hian hmun kilkhawr leh hla zawka thil bo zawn hmuh harsa ṭhinte chu nasa takin a sutkiang dawn niin a lang.
A zawn hmuh awlsam nan a range tihzauh a nih bakah, a speaker pawh za zela 50-in a tiri ring zawk a ni. Heng hmasawnna pahnih hian hman hmasak aia awlsam zawk leh hmuh hma zawka thil bo hmuh leh nan hmantute a ṭanpui dawn a ni. A man lam chu Apple chuan an tidanglam lova, pakhat man chu $29 a ni a, a ruala pali lei tan $99 a ni leh bawk ang. Apple website-ah order theih a ni tawh a, kumin chhung hian khawvel dawt hrang hrangah hralh chhuah ṭan a ni bawk ang.