Apple chuan an device hlui tawh, iOS thar ber support tawh loh te tan update pawimawh tak an chhuah a. He update hi iMessage, FaceTime leh Apple account sign-in te a thlawna hman chhunzawm theih nan a ni a, kum tam tak update hmu tawh lo device-te tan pawh Apple chuan ngaihpawimawhna a la lantir a ni.
Update chhuah thar te hi iOS 12.5.8 (iPhone 5S leh iPhone 6 tan), iOS 15.8.6 (iPhone 6S, iPhone 7 leh iPad Air 2 tan), leh iOS 16.7.13 (iPhone 8 leh iPhone X tan) te an ni. iOS 12 phei chu kum 2023 January hnu lamah update thar an hmu leh ta miah lo a, kum thum hnu lama Apple-in hetiang update a chhuah leh hi thil thleng zen zen lo a ni.
Apple release notes-ah chuan heng update-te hian feature thar a keng tel lo a, ‘security certificate’ chauh an thlak a ni. He certificate hi kum 2027 January-ah a expire dawn a, chumi hma ngeia update hi tih loh chuan iMessage leh FaceTime te a hman theih loh phah dawn a ni. He certificate thlakna hi iOS 18.7.4-ah pawh Apple chuan a kalpui nghal bawk.
Phone hlui leh tablet hlui kum 12-13 kal taa chhuah tawh te hi tunlai internet khawvelah chuan hman a har tawh hle a. RAM tlem vang leh browser hlui tawh vanga internet khawih a harsat tawh hle rualin, messaging device atan leh naupangte tana ‘white noise machine’ atante an la tangkai hle a ni. Apple-in heng device hlui te tlem berah an hnathawh tur ang thawk thei tura a la enkui hram hram hi thil lawmawm tak a ni.