Australian Open khelh mekah tennis player lar Iga Swiatek leh Jessica Pegula te chuan player-te awmna hmun, mimal nun hman vena atana an siam (players’ areas)-a camera tam lutuk chu an sawisel a. Swiatek-i chuan player-te chu ‘zoo-a ran awm thlir’ ang maia thlir an ni tawh niin a sawi hial a ni.
He thil hi Thawhlehnia Coco Gauff-i’n corridor-a a racket a vawm chhia camera-in a lo la fuh atang khan a thupui zual a. Australian Open hian kum 2019 atang khan Rod Laver Arena hnuai lama player-te gym, warm-up hmun leh corridor-ah te camera hi an lo dah tawh a, hei hi Grand Slam dangte aiin a tam zawk hle a ni. ‘Keini hi tennis player nge kan ni a, nge zoo-a ran, an ek thleng pawha thlir thin ang kha kan ni zawk?’ tiin Swiatek-i chuan a lungawilohna a lantir.
Quarter-final-a Elena Rybakina laka a tlawm hnuin, Swiatek-i chuan hetiang thlalak ruk hian player-te thlamuang taka an awmna a tihbuai thu a sawi belh a. Jessica Pegula pawhin hetiang hian mimal nun (privacy) tibuai khawpa thla lak fo hi a tul lo tih a sawi a. Pegula-i chuan player-te chu ‘microscope’ hnuai ang reng an nih thu leh, bathroom leh inbualna hmun chauh chu camera laka an fihlimna hmun a nih thu a sawi bawk. ‘Online-ah te player-te phone an hmet lai thlengin an zoom kual a, hei hi a tul lo hle a ni,’ tiin a sawi belh.
Tournament buatsaihtu Tennis Australia lam erawh chuan camera an dah chhan chu fan-te leh player-te inkarah inzawmna thuk zawk siam a nih thu an sawi a. Player-te mimal nun leh an thiamna pholantir hi a tawk chiah (balance) a awm tur a ni a, player-te ngaihdan pawh an ngaipawimawh dawn tih thuchhuah an siam bawk. Tennis hian khawvel infiamna dangte, entirnan Formula 1 ‘Drive to Survive’ documentary hlawhtlinna te chu entawnin player-te hmel thup pholantir hi an tum ber a ni.