Las Vegas-a Harry Reid International Airport atanga London pan tura thlawh chhuak mek British Airways thlawhna chuan an thlawh chhuah rual chiahin a hnung lam wheel pakhat a hloh a ni. He thil thleng vanduaithlak tak hi thlawhna thlawh chhuah laia lo thlirtu ten chiang takin an hmu a, Airbus A350-1000 thlawh kan rual chiah hian a wheel ding lam hnung chu a thlawn a, airfield-ah a tla thla nghal a ni.
British Airways chuan he thil thleng chungchangah hian thuchhuah siamin, an tan himna leh venhimna chu thil engkim aia pawimawh a nih thu an sawi a. Thlawhna enkawltu thuneitute chuan he thil thleng hi an chhui zui nghal a, investigation hna an kalpui lai hian thuneitute an puih mek thu leh, passengers-te himna tura hma lak chu an dah pawimawh hmasa ber tih an tarlang bawk.
Harry Reid International Airport thuneitute chuan thlawhna hi Thawhțanni khan a thlawh chhuah thu leh, wheel pakhat tla mah se thlawhna hi London-ah him takin a tum thei tih an nemnghet a ni. Thlawhna a tum hnu hian harsatna dang a thleng zui lo a, airfield-a wheel tla pawh kha airport hnathawktute chuan an chhar tawh a ni. He thil thleng vang hian hliam tuar emaw, hmunhma chhe dang emaw a awm lo hlauh a ni.
He incident chungchang hi US National Transportation Safety Board (NTSB) pawh hriattir an ni tawh a, thil thlen dan chhui chiang turin hma an la mek a ni. British Airways Airbus A350-1000 hi thlawhna thar leh changkang tak a nih avangin, thlawh chhuah laia a wheel a thlawn thei hi aviation safety expert-te chuan mak an ti hle a, khawl chhia nge ni a thil dang vang tih uluk takin an zir chiang dawn a ni.