Conservative party hruaitu Kemi Badenoch-i chuan an party hruaitu hlui, Suella Braverman-i’n Reform UK a zawm hnuah, an party thuchhuah (statement)-in a hriselna leh rilru dinhmun (mental health) a tarlang palh chu pawi a tih thu sawiin ngaihdam a dil. He thuchhuah hmasa zawkah hian, Conservatives-te chuan Suella hriselna chu an ngaihpawimawh em em thu leh a hlim lo hle tih an tarlang a, mahse hei hi Badenoch-i chuan a dik loh thu leh an party culture tura a duh loh thu a sawi a ni.
Kemi Badenoch-i chuan BBC hnenah he thuchhuah hi a dik lo tih sawiin, ‘He thuchhuah hi a chhuak tur a ni lo a, kan thiarfihlim (retract) tawh baka, a petu pawh ka be tawh a ni,’ a ti. Mental health charity hrang hrang leh politician-te chuan he thuchhuah hi an sawisel nasa hle a, Braverman-i ngei pawhin he thuziak hi ‘a zahthlak (pathetic)’ a tih thu a lo sawi tawh a ni. Conservative party chuan he thuchhuah hi ‘tihpalh’ vang a ni tih an sawi bawk.
He ngaihdam dilna hi awm mah se, Badenoch-i chuan a thusawi dangah Reform UK-a lungawi lohna vanga liam ta (defectors)-te chu ‘drama queens’ tiin a sawi thung. An party hruai dan leh a thil tumte nena inrem lo chu ‘party chhuahsan’ mai tura tiin, hna an hmuh loh vanga hetiang thil hi ti an ni tih a sawi a. Braverman-i, Robert Jenrick leh Andrew Rosindell-te hian kar hnih chhungin Reform UK hi an zawm a ni.
Badenoch-i chuan Conservative Party chu ‘mainstream party’ a nih thu leh mi tlemte lungawi lohna vanga an buai a rem loh thu a tarlang. Sir Andy Street leh Ruth Davidson-te’n movement thar ‘Prosper UK’ an din pawh a thlawp thu sawiin, mahse ama agenda thlawp lo zawnga chete erawh an party-ah hmun an neih loh tur thu a sawi bawk. Ram hmawr leh hmawr (left leh right) inkarah ni lovin, mipui mimir tana ‘common sense’ hmanga hmasawnna an neih a pawimawh tih a uar hle a ni.