Russian tlangval Matvei Rumiantsev, kum 22, chu London-ah hmeichhe pakhat a sawp avangin thiam loh chantir a ni. He thil thlengah hian US President fapa naupang ber Barron Trump chuan a thiannu an sawp lai hi video call-ah a hmuh thu UK police-te hnenah a report a ni.
Thil thlen dan hi kum 2025 January thla daih tawh kha a ni a. Barron Trump, kum 19, chuan US atangin video call-in he hmeichhia hi a be a, chumi lai chuan Rumiantsev hian a thiannu hi a lo sawp a ni. Snaresbrook Crown Court-ah thubuai hi ngaihtuah niin, tlangval hian hmeichhe pakhat hliam na tak a siamsak bakah, thudik a tihkawi (perverting the course of justice) avangin thiam loh chantir a ni.
Court-a tarlan danin, Trump chuan January ni 18, 2025-ah khan hmeichhe pakhat hi be-in, chumi hnu lawk chuan UK police-te a bia a ni. ‘US atangin ka rawn bia che u a, hmeichhe pakhat ka be zo chiah a, an sawp mek a ni,’ tiin police-te hnenah hian a report a ni. Police operator-in engtin nge he hmeichhia hi a hriat tiha a zawhna chu, Trump chuan social media-ah a hriat thu leh a detail-te chu a pawimawh loh thuin a chhang a ni.
Prosecutor Serena Gates chuan Rumiantsev hian he hmeichhia leh Trump-te inthianna hi a thik nia a hriat thu a sawi. Rumiantsev pawh hian thikna a neih thu chu a pawm a ni. He tlangval hi jail-ah a awm tawh bawk a, a sawp hmeichhia hnenah hian a thubuai thehluh hi hnukdawk leh turin jail atangin lehkha a thawn bawk a ni. Judge Mr Justice Bennathan KC chuan Trump-a report hi finfiahna (evidence) hlawm lian ber anga hmang lo turin jury-te a hrilh a, a chhan chu court-ah amah ngei a inlan loh vang a ni. Mahse, finfiahna dangte nen tlangval hian thiam loh a chang ta tho a ni.