BBC Director General Tim Davie chu April thla hian a bang dawn

BBC Director General Tim Davie chuan kumin April thla hian a hna a chhuahsan dawn tih puan a ni ta. Hei hi nikum November thlaa banna a lo thehluh tawh hnuah thutlukna hnuhnung zawk a ni a, US President hlui Donald Trump-a thu sawi Panorama-in a her danglam nia sawi avanga harsatna an tawh hnuah he thutlukna hi a siam a ni.

Davie-a a chhuah hnu hian interim Director General atan Rhodri Talfan Davies ruat a ni dawn a, ani hi kum 2021 atang khan Director of Nations hna lo thawk tawh leh tun hnai hian BBC-in Artificial Intelligence (AI) a hman dan tur buaipuitu ber a ni bawk. Tunah hian BBC chuan Director General nghet tur an zawng mek a, he hna hi British media-a hna hautak leh challang berte zinga pakhat a ni.

Tim Davie hi kum 2020 khan BBC-a Director General 17-na atan khan a lo lut a, a thawh chhung hian buaina leh harsatna hrang hrang a hmachhawn thin a ni. Trump-a dokumentari chungchangah hian BBC chuan defamation lawsuit nasa tak an hmachhawn mek bawk a, hei hi January 6, 2021-a Trump-a thu sawi kha Panorama-in a duh angin an lo cut kual avanga thleng a ni a, US President hian nasa takin a dem a ni.

BBC Chairman Samir Shah chuan Tim Davie-a hna thawh leh a thawhhlawkna te chu a hnu deuhah la lawm an tum thu a sawi a. Talfan Davies chu hruaitu tha tak, public service broadcasting lama tui leh thiamna nei thuk tak a nih thu a sawi bawk. Davie-a thlaktu tur hi BBC tan a pawimawh hle a, khawvel hmasawnna mila BBC kalpui zel tur leh sawkar nena inbiakna pawimawh tak tak hmachhawn tur an ni dawn a ni.