California Governor Gavin Newsom chuan social media larsap TikTok chu President Donald Trump-a sorkar sawiselna content-te a thup (censor) nia puhna chungchangah chhui hna a tan thu a puang. He thil hi TikTok-a US operations-te Trump thlawptu group-te hnenah hralh a nih hnu lawka thil thleng a ni a, user tam takin an thuziak leh video-te tuman an hmuh theih loh thu an sawi nasa hle.
Governor Newsom-a pisa chuan TikTok hian President Trump sawiselna content-te a hnawl emaw, a thup sak emaw tih fiahna tam tak an hmuh tawh thu an tarlang a. ‘TikTok hi Trump thlawptu business group-te kuta a luh hnu hian content pawimawh thup sak nia sawina leh fiahna kan hmu tam hle a ni,’ tiin X (Twitter hluia) an post-ah an tarlang. He chhui hna hian California state dan leh hrai an palzut em tih a enfiah dawn a ni.
User tam tak chuan an video thar tarlante chu ‘zero views’ ah a tang reng tih an report a, hemi bakah hian thil thleng thar, Minneapolis-a federal agent-ten Alex Pretti an kah hlum chungchanga sorkar demna thuziakte pawh hmuh hleih theih loh khawpin a awm tih an sawi. TikTok erawh chuan heng harsatnate hi an data centre pakhata power a thih vanga ‘infrastructure issue’ thleng vang niin an sawi a, political censorship nen inzawmna a neih loh thu an sawi thung.
He harsatna hi US-a TikTok enkawltu thar, TikTok USDS Joint Venture LLC hnuaia a awm hnu lawka thleng a ni. He venture-ah hian cloud technology lama larsap Oracle chuan 15% stake a nei a, US user-te tana algorithm hranpa siam hna an thawk bawk. Celebrity tam tak, ‘Hacks’ actress Meg Stalter-te pawhin TikTok chu hralh a nih hnuah zalenna a awm tawh lo tiin an account an delete phah hial a, social media-ah ‘RIP TikTok’ tih thupui pawh a lar hle a ni.