Health Secretary thar Robert F. Kennedy Jr. hnuaia federal vaccine advisory panel hruaitu thar, Kirk Milhoan chuan vaccine chungchanga a ngaihdan a sawi chhuah avangin American Medical Association (AMA) chuan nasa takin an sawisel a. Milhoan hian podcast pakhatah polio leh measles (phuaideng) hri danna te hi kan la mamawh tak tak em tih a zawhna chuan doctor leh mithiamte a tibuai hle a ni. Kirk Milhoan hi pediatric cardiologist a ni a, December thla khan CDC hnuaia Advisory Committee on Immunization Practices (ACIP) chair atan ruat a ni.
A thil sawi tam tak zingah Milhoan chuan ‘established science’ (science thiamna lo awmsa) hi a ngainat loh thu leh science chu a thil hmuh leh hriatte (observation) chauh a nih thu a sawi a. A hmain ACIP panel-ten vaccine policy an lo duan thin dante chu a sawisel a ni. Vaccine a huat vang a nih loh thu sawi mah se, vaccine hian allergies leh eczema te a thlen thei tih fiahna awm lo thu a sawi a, COVID-19 vaccine hian naupang a thah thu fiahna awm lo a sawi lang bawk.
Polio chungchangah Milhoan chuan, ‘Tunlai hun hi polio vaccine siam chhuah hmasak ber lai kum 1950-te kha a ni tawh lo,’ tiin, faina leh nitin khawsak dan a danglam tawh avangin vaccine lak hi a la tul em tih kan ngaihtuah a hun tih a sawi a. Herd immunity (mipui punkhawmna hmun hri laka himna) vawn tlat a pawimawh em tih a zawhna hi AMA Trustee Sandra Adamson Fryhofer chuan nasa takin a sawisel a ni. Fryhofer chuan, ‘Hei hi inhnialna satliah a ni lo, hnungtawlhna hlauhawm tak a ni,’ tiin, polio hi enkawlna a awm loh avangin vaccine lak loh chu paralysis (zeng) leh thihna hial thlen thei a nih thu a sawi.
Hetiang hian CDC-a hruaitu thar-te leh medical community-te an inkhit mek a, state 27 leh Washington, DC te chuan CDC vaccine recommendations thar hi zawm an tum loh thu an sawi tawh a ni. American Academy of Pediatrics (AAP) pawhin kum 2026 tana naupang vaccine schedule thar an siam a, hei hi mithiam tam takin an thlawp zawk thu an sawi. AAP President Andrew Racine chuan naupangte tana tha ber leh science-ah innghat tlat recommendations an chhuah chhunzawm zel tur thu a sawi bawk a ni.