UEFA Champions League league phase khelh mekah zanin hian a vawrtawp thlen a ni dawn a, team 30-te dinhmun tur a chiang tawh dawn a ni. Arsenal leh Bayern Munich-te chu last 16-ah an tling chiang tawh a, mahse club dang zawng deuhthaw erawh top eight-a awm tum leh play-off hmun inchuhin an la thawk rim hle a ni. He inelna format tharah hian team 36 an awm a, table-a pariat hmasa apiang chu direct-in round of 16-ah an tling nghal dawn a ni.
English club parukte chu an vannei viau a, Arsenal chu an tling tawh a, Liverpool, Tottenham, Newcastle United leh Chelsea-te pawh tun dinhmunah pariat hmasa zinga awm lai an ni. Manchester City erawh play-off spot-ah an awm mek a, mahse point 13 neiin Newcastle leh Chelsea-te nen point khat chiahin an inthlau a ni. Zanin hian match 18 a rualin khelh a ni dawn a, ram khat atanga club paruk round of 16 tling thei an awm vawikhatna a ni thei bawk ang.
Zanin match hmuhnawm tur zingah player leh manager hlui an hmachhawn turte chu thil thunawn tham a tling a ni. Real Madrid chuan an manager hlui Jose Mourinho enkhelh Benfica an hmachhawn dawn a, Chelsea pawhin an manager hlui Antonio Conte enkhelh Napoli an hmachhawn ang. Mourinho-a Benfica hian hna hautak an nei a, top eight-ah an tling thei tawh dawn lo va, play-off hmun chan tur pawhin Real Madrid hi hneh ngei ngei an mamawh dawn a ni.
Play-off khel tur zawnna lamah pawh boruak a sang hle a, team 32-na Ajax thlengin an la beisei thei a ni. Tun thlengin team pali — Eintracht Frankfurt, Slavia Prague, Villarreal leh Kairat Almaty — chiah hi tla chiang anga ngaih an la ni. Borussia Dortmund thlengin top eight-a tlin beiseina an la nei a, chuvang chuan zanin match hrang hrangte hi a hmuhnawm dawn hle a ni. Match-te hi Mizoram hunin zanin zanlaiah khelh vek a ni ang.