Nilaini zana Champions League-a Napoli nen an inkhelh hmain, Chelsea chuan an fan Naples-a zin mek te chu ‘fimkhur em em’ turin an chah a, hei hi supporter pahnih hliam tuara damdawi in panpui an nih hnuah a ni. Italy khawpui Naples hi a hma atang tawhin khual supporter-te tan hmun hlauhawm leh Napoli ultras-te’n an lo beih thinna hmun a ni a, thuneitute pawhin he hmun hi an lo vil uluk tawh hle thin a ni.
Chelsea thuchhuah chuan, ‘Thawhlehni zan khan Naples khawpuiah thil thleng a awm tih club chuan a hria a ni. Fan pahnih damdawi inah enkhelh mek an ni a, an hliam hi an nunna atana hlauhawm erawh a ni lo. Club chuan supporter zawng zawngte he khawpuia an awm chhung hian fimkhur hle tur leh inkhel hmaa thurawn pek tawh te uluk taka zawm turin kan hriattir nawn a ni,’ tiin an sawi.
Social media lamah erawh Chelsea fan-te hi chemtea vih an nih thu sawi a awm a, mahse he hliam hi eng vanga thleng nge tih erawh thuneitute lam atangin finfiahna a la awm lo. Chelsea hian he inkhel tur hian ticket 2,500 vel an hralh a, fans-te chu hmun bik ruatah inhmu khawm a, shuttle bus hmanga police-te venhimna hnuaia stadium pan turin an hriattir a ni.
He inkhel hmaa travel advice an tihchhuahah pawh Chelsea chuan, ‘UEFA competition matches lai hian Naples-ah khual supporter-te beih an nih chang a awm thin,’ tiin an lo sawi tawh a ni. Supporter-te chu khawpui chhunga kea vah kual lo tur leh, Chelsea fan an ni tih hriat theihna tur club rawng emaw, emblem emaw inbel lo turin an ngen bawk.
Liam Rosenior-a naute hian Stadio Diego Armando Maradona-ah hian hnehna an chan ngei a ngai a, tichuan Champions League last-16-ah an tlang thei dawn a ni. An mikhualtu Napoli erawh Serie A champion lai an ni a, anni pawh hi he inelnaa la awm reng tur chuan chak an mamawh ve tho a ni.