China sorkar chuan kar eng emaw zat a dan hnuah, an rama tech company lian pathum—ByteDance, Alibaba leh Tencent-te chu Nvidia AI chip chak tak tak, H200 lak luh a remtihsak ta. Reuters report-in a tarlan danin, chip nuai 4 chuang zet lak luhna tur hi remtih a ni a, hei hian thil thleng mek leh Beijing-a thuneitute rilru sukthlek a tilang chiang hle. Beijing hian US export clearance a awm hnu pawhin kar hnih thum chhung chu heng chip-te hi luh an lo phal lo tawh a ni.
He thutlukna hi Nvidia CEO Jensen Huang-a’n China a tlawh lai tak a ni bawk. US sorkar chuan January 13 khan he chip hi China-ah hralh phalna a lo pe tawh a, mahse China custom thuneitute chuan nikum December thla atang khan lak luh an lo dang char char a ni. H200 hi Nvidia-in hma lam hun atana chip a siam chhuah thar, B200 dawt chiaha chak a ni a, hmana an phal thin H20 aiin a chak zawk vawi ruk zet a ni bawk. Hei hian China-in AI thiamna (Artificial Intelligence) kawngah a khingpui ramte um phak nana a mamawh zia a tarlang a ni.
China tech giant-te hian hetiang chip chak tak tak hi an mamawh em em a, a chhan chu Large Language Models (LLM) lian tak tak enkawl nan leh AI khawvela an khingpui OpenAI te nen an inelna kawngah a pawimawh em em vang a ni. Chip chak tak hian AI zirna hun a titiwi a, thil chhut kualna kawngah sum leh hun a tikhawm nasa hle a ni. Mahse, US leh China inkarah AI accelerator chip hi inbeihna hmunpui ber pakhat a ni tawh a, US sorkar pawhin China-in AI-ah hma a sawn lutuk hlauhthawnna an nei a, chuvangin export dan pawh an ti khauh hle thin.
He remtihna hian thil tam tak a kawk a; pakhatnaah chuan Beijing hian an tech company lian leh pawimawhte chu khawvel huapa inel thei tura an duhzia a tarlang a. Mahse, thuneitute hian mahni ram chhunga siam chhuah (domestic chip industry) pawh tihhmasawn an tum tel tho a ni. Hetiang chip tha hi lak luh remti mah se, sorkar chuan hmun dangah mahni rama siam chip pawh lei tel ngei tura tech company-te hi nawr an tum niin a lang. Alex Capri, National University of Singapore-a senior lecturer chuan Beijing-a thuneituten H200 lak luh an phalna chhan chu an ram thiamna leh inelna tihchak nana an tih a nih thu a sawi bawk a ni.