Cisco Systems chairman leh chief executive Chuck Robbins chuan khawvel thiamna thar Artificial Intelligence (AI) hian internet aia nasa zawkin khawvel a thlak danglam dawn tih a sawi a. Mahse, he thiamna thar thang chak lutuk hi tunah hian a khat lian (bubble) hle a, hlawhtling tawk lo company tam tak an tluchhia ang a, chhiatna nasa tak a thleng dawn tih BBC hnenah a sawi.
Cisco hi khawvela technology company lian berte zinga mi a ni a, AI hman theihna tura thil pawimawh (infrastructure) tam tak siamtu an ni. Robbins-a sawi dan chuan, AI hian mihringte hnathawh dan a thlak hlawk dawn a, hna thenkhat chu nuaibo a ni hial ang. Robbins chuan kum 2000-a ‘dotcom bubble’ puah laia Cisco hlutna nasa taka a tlahniam lai kha a hre chhuak a, tunah pawh hian pawisa tam tak hi tling zo lo tur company-ah invest a nih a rin thu a sawi a ni.
Hnathawh chungchangah Robbins chuan thawk tute chu AI lakah fimkhur turin a chah a. AI hian hna tam tak a nuaibo dawn rualin, mihringte tan hmasawnna kawng thar a hawng dawn bawk a ni. A bikin customer service lamah chuan mihring tlem zawk an ngai dawn a, mahse thiamna thar hi hlau lo a, hmang thiam tura inzir chu tunlai huna thil pawimawh ber a ni tih a sawi. ‘I hna hi AI-in a laksak ai che chuan, AI hmang thiam tak tuemawin i hna a laksak zawk hlau rawh,’ tiin a sawi.
He technology hian cybersecurity lamah pawh harsatna a thlen belh a hlauhawm thu a sawi bawk a. Internet hmanga inbumna leh cyber attack-te a tihnasa thei dawn a ni. Robbins hi US President Donald Trump-a nena inbe hnai thin tu a nih avangin, America sumdawnna khawvelah pawh thu neitu pawimawh tak a ni a, technology leh ram hruaitute inkarah palai hna a thawk mek bawk a ni. UK pawh AI superpower a nih theihna kawngah dinhmun tha takah a ding tih a tarlang bawk.