Novak Djokovic chu Australian Open semi-final-ah a tling a, mahse a thlen danah hian a lungawi chiah lo. Quarter-final-ah Lorenzo Musetti nen an inhmachhawn a, set hnih an khelh hnuah Musetti hi a hliam avangin a bang a ni. He vanneihna hian Djokovic-a 25-na Grand Slam singles title lak tumna kawngah nasa takin a pui thei a ni.
Musetti chauh hi Djokovic-a vanneihna a ni lo. A hmain fourth-round-ah pawh Czech opponent Jakub Mensik chu a inhnuhdawh avangin khel miah lovin a tlang tawh a. Kum 38-a upa Serbian star hian hemi avanga a taksa a hahdam deuh tur chu a lawm viau rualin, court-a hun a hman tlem lutuk avangin a game a hriam tawk lo vang tih a hlauthawng hle. Djokovic-a’n kumin Australian Open-ah hian set 11 chauh a la khel a, darkar kua vel chauh court-ah a la awm a ni.
Djokovic hian 24 January-a third-round a khelh hnuah set hnih chauh a la khel a, chung set hnihah pawh chuan a tlawm ve ve a ni. Friday-ah hian Jannik Sinner nen semi-final an khel dawn a, Sinner hi a vawi thum nana a zawn a title lak tum a ni. Djokovic chuan, ‘Ka career-ah hian eng hian nge pui ang a, eng hian nge pui lo vang tih hriat a har hle a ni,’ tiin a dinhmun a sawi. Fourth seed Djokovic hian a taksa lamah erawh major injury a neih loh thu a sawi a, a ke-a blister awm deuh chu a harsatna ber a ni rih.
Australian Open-ah hian hliam chung pawhin vawi tam a lo champion tawh a, kum 2023-ah pawh a hamstring 3cm-a thler chungin a lo champion tawh a ni. Kuminah erawh taksa hrisel takin a khel thei a, Sinner leh Alcaraz-te lakah technical leh mental lamah a inbuatsaih that a ngai hle dawn a ni. Djokovic hian semi-final-a hlawhtlinna chan leh theih nan thlarau lam puihna pawh a beisei hle a, ‘Zanah hian vawi hnih zet ka tawngtai dawn a ni,’ tiin a sawi.