Novak Djokovic chuan Australian Open semi-final a lut leh ta a, mahse a luh dan erawh a beisei loh dan tak a ni ang. Thawhlehni zan khan Italian tlangval Lorenzo Musetti nen an inkhel a, Musetti hian set hnih a lak tawh hnuah a malpui (thigh) a hliam avangin a khel chhunzawm thei ta lo a ni. Musetti hian 6-4, 6-3 in set hnih a la hmasa a, set thumna an khelh laiin a tawp san ta a ni.
He match-ah hian Djokovic hi a khel tha lo hle a, a vawm (serve) leh a vaw let (return) a dik lo nual a, a che a buai hle. Musetti erawh a tir atangin a khel tha hle a, Djokovic hi set hnih chhung chu a thunun hneh hle a ni. Set thumna an khelh tan hnu lawkah Musetti hi a malpui na avangin a ‘medical timeout’ a la a, mahse a serve leh a chet vel a harsa tawh hle a, 3-1 a a hnufual laiin a tawp san ta a ni.
Djokovic pawh hian blisters (ke vawng) avangin set hnihna zawhah treatment a la ve bawk a, tun tournament-ah hian a khingpuite inhnuhdawh vawi hnihna a ni ta. Round 4-ah pawh khan a hmachhawn tur Jakub Mensik a inhnuhdawh tawh bawk a ni. Djokovic chuan, ‘Amah (Musetti) kha a khel tha zawk hle a, zanin hian ka tla hlen dawn emaw ka ti hial a ni. A chunga thil thleng hi pawi ka tihpui hle a, a dam leh vat ka beisei,’ tiin a khingpui a fak hle.
Serbian star hian Grand Slam vawi 25-na laa record thar siam a tum mek a, Australian Open vawi 11 lak a tum bawk. Mahse, semifinal-ah hian tun aia a khelh that a ngai hle dawn a, defending champion Jannik Sinner leh Ben Shelton-te inkhela chak zawk a hmachhawn dawn a ni. Sinner hi kum hnih kal taa semi-final-ah Djokovic hnehtu kha a ni nghe nghe.