Ecuador sorkar chuan Thawhlehni khan Minneapolis-a an consulate-a US immigration agent pakhat luh tum chu nasa takin a dem a, hei hi ram hrang hrang inremna ‘Vienna Convention’ bawhchhiatna a nih thu an sawi. Consular official-ten agent hi luh an phal lo va, hemi hun laia consulate chhunga Ecuador mi leh sa awmte himna an ngaih pawimawh thu an sawi bawk. He thil thleng hi khawvel pum inremna, kum 1963-a siam ‘Vienna Convention on Consular Relations’ nen a inkalh hle a ni.
He inremna hnuaiah hian ram dang consulate-te chu ram neitu sorkar lakah an him tur a ni a, consulate hotute phalna lovin sorkar thuneitute an lut thei lo a ni. Ecuador sorkar chuan ICE agent-te hi luh an phal loh thu leh, emergency thil (kangmei ang chi) a nih loh chuan thuneitute an luhna chhan tur a awm lo tih an tarlang. Hei hi thuneihna hman khawlohna leh diplomatic protocol palzutna lian tak niin an ngai a, hemi chungchangah hian an lungawi lo hle a ni.
Social media-a video darhah chuan consular official pakhatin ICE agent hnenah ‘He hmun hi consulate a ni, helai hmunah hian in lut thei lo’ tia a au lai a hmuh theih a. ICE agent erawh chuan ‘Min khawih a nih chuan ka man khawp ang che’ tiin vau zui mah se, official hian kawngka a khar hman a ni. Ecuador sorkar chuan he thil thleng chungchangah hian US Embassy-ah lungawi lohna lehkha (official protest) an thehlut nghal a, diplomatic level-a chinifel a nih an beisei hle a ni.
He thil thleng hi Minneapolis khawpui chhunga boruak a thinrim laia thleng a ni a. Kar hmasa lawk khan immigration agent-ten nurse pakhat, Alex Pretti leh mi dang pakhat Renee Good an lo kah hlum tawh avangin boruak a sa hle a ni. Ecuador President Daniel Noboa leh US President Donald Trump-te hi thawkho tha tak an ni thin a, mahse tun tum thil thleng erawh chuan an inkar boruak a tichhe hlek thei tura ngaih a ni. President Trump chuan Minnesota-a immigration check-pui chu tlem ‘tihziawm’ deuh a tum thu a sawi ve bawk a ni.