Scottish Child Abuse Inquiry chuan Edinburgh-a Fettes College, Scotland-a private school hmingthang berte zinga pakhat chuan an zirlaiten kum tam tak chhung vawndik lohna leh hrawmna an tawh lakah a venghim tawk lo tih a tarlang a. He inquiry kaihruaitu Lady Smith chuan kum 1950 atanga 1980 tawp lam thleng khan naupangte chu zirtirtu leh zirlai dangte lakah an him lo hle tih sawiin, ‘shameful’ tiin a sawi hial a ni.
Lady Smith chuan he school-a thawk thin hming engemaw zat a tarlang a, chung zingah chuan headmaster hlui Anthony Chenevix-Trench pawh a tel. Chenevix-Trench hi Eton-ah a thawk thin a, chutah pawh chuan zu in thiam lo leh naupang vaw hrep thin a nih avangin harsatna a lo nei tawh a, mahse Fettes College hian an la chhawm lui zel a ni. A hnuah phei chuan abuser dangte pawh a lo thup pui thin tih hmuhchhuah a ni bawk.
Fettes College, UK Prime Minister hlui Sir Tony Blair-a lo kalna thin pawh a nih avanga hriat hlawh tak hian, he harsatna thleng chungchangah hian ngaihdam an lo dil tawh a. Lady Smith chuan, ‘Naupangte chu school lamin an venghim zo lo a. Awlsam takin venghim thei an nih laiin an him lo hi a pawi hle a ni,’ tiin a report-ah hian a ziak a. Zirlai thenkhat phei chu tun thlengin he hrawmna avang hian an la tuar reng tih a tarlang.
Tun hnaiah hian he school-a zirtirtu thawk thin Iain Wares chu naupang hrawmna kaihhnawihah South Africa atanga thawnchhuah (extradition) tura hma lak a ni a. Lady Smith findings hi Scotland-a boarding school-te enfiahna (case study) peng pakhat a ni a. He inquiry hian thudik zawnchhuah leh nakin zela naupangte an him zawkna tura hmalakna kawng daptu a nih an beisei hle a ni.