France senator hlui Joel Guerriau chu kum 2023-a MP hmeichhe pakhat, Sandrine Josso-i in turah hlo ruihnathei (ecstasy) lo pawlha thiam loh chantir a ni a. Thawhlehni khan Paris court chuan Guerriau hi kum li chhung lung in tang turin a hrem a, he hremna zinga thla 18 hi lung in chhungah ngei a hman a ngai dawn a ni. Hemi bakah hian Josso-i hnenah hian rilru natna (emotional distress) a thlen avangin Euro 5,000 (£4,348) lai zangnadawmna pe turin thupek a ni bawk.
Joel Guerriau, kum 68 mi hian kum 2023 November thla khan Josso-i hi a in (apartment)-ah a lo sawm a, chutah chuan champagne no-ah MDMA hlo a lo pawlh sak a ni. Court-ah Guerriau hian hlo a pawlh ngei tih a pawm a, mahse thil tihpalh (accident) leh ama in tura a tih zawk a nih thu sawiin, Josso-i chu pawngsual tumna rilru a neih loh thu a sawi ve thung. Mahse, court chuan a sawi hi thutakah a ngai lo a, hlo hmantir chungchangah hian thiam loh a chantir ta a ni.
Sandrine Josso-i chuan court thutlukna hi a lawm hle a, ‘thlamuanna nasa tak’ a hmuh thu a sawi. Josso-i chuan he thil a tawn dan sawiin, Guerriau-a re-election lawm tura a va tlawh khan champagne a in hnuah a nuam lo nghal hle tih a sawi a. A senator thianpa chu ‘mi beisei nei’ hmel takin a lo en reng a, a chau hle tih a hmuh chuan khumah a muttir palh ang tih hlauvin hmanhmawh takin a chhuahsan thu a sawi bawk. Damdawi in a pan hnuah a thiltihtheihna (blood report) atangin MDMA a in hnem hle tih hmuhchhuah a ni.
He thil thleng hnu hian Josso-i chu ‘chemical submission’ tia sawi, mi dangte ruihtira pawngsual emaw tharum thawhna lakah beitute zinga a hlun ber pakhat a lo ni ta a. France rama Gisèle Pelicot-i thupui lian tak, a pasalina mipa dangte ruihtira a pawngsualtir thin thu nen pawh a inzawm hle a ni. Guerriau hi Horizons party atanga senator ni thin a ni a, he thupui a chhuah hnu hian a party atanga ban niin, nikum October thla khan senator a nihna atang pawhin a lo bang tawh bawk a ni.