Fulham leh Manchester City te chuan an winger Oscar Bobb transfer chungchangah inremna an nei ta a, he inremna hi £27million huta ni tih hriat a ni. BBC Sport-in a lo tarlan tawh angin club pahnihte hian inbiakna an nei reng a, tunah hian thu tlukna felfai tak an siam ta a ni. He winger thiam tak hian Fulham zawm hi a duh hle tih hriat a ni a, reilo teah Craven Cottage-ah hmuh theih a ni tawh ang.
Bobb-a hian Manchester City-ah khelhna hmun a chang tlem tial tial a, kumin January thlaa Antoine Semenyo-a’n Bournemouth atanga City a zawm hnu khan a dinhmun a chiang lo zual a ni. Pep Guardiola-a’n Inrinni-a Wolves an hneh hnu khan Bobb-a chungchang hi a sawi a, chhuah a duh leh duh loh zawhna chu ‘Ka ring’ tiin a chhang a ni. He Norway international hian Bundesliga club lian Borussia Dortmund ngaihven pawh a hlawh hle a, mahse London club hi a zawm zawk dawn niin a lang.
Kumin season-ah hian Oscar Bobb hi Manchester City tan vawi 15 a inlan tawh a, goal erawh a la thun rih lo thung. A inlan hnuhnun ber chu December ni 17-a Brentford nena Carabao Cup an khelh tum kha a ni a, mahse minute 20 an khelh tlin hmain inhliam avangin a chhuak a ni. Bobb-a hian inhliam vanga hun harsa a lo pal tlang tawh thin a, 2024 August thla pawh khan a ngal ruh a tliah avangin season hmasa kha a khel mang lo bawk a ni.
Fulham manager Marco Silva hnuaiah Craven Cottage club hi an che tha hle a, tunah hian Premier League table-ah pasarihna hmunah an awm mek. Inrinni khan Brighton chu 2-1 in an hneh a, tun hnaia game pasarih an khelhah vawi khat chauh an la tlawm a ni. Bobb-a hian Fulham a zawm a nih chuan a thianpa Sander Berge nen an inkhel dun leh thei dawn a, chu chuan a chet thatna kawngah nasa takin a tanpui a rinawm bawk. Fulham hian an squad thuam that nan PSV forward Ricardo Pepi pawh lakluh an tum mek bawk a ni.