Google chuan khawvel pum tana an browser hman lar ber Chrome-ah Gemini AI theihna thar ‘Auto Browse’ an dah lut ta. He AI agent thar hi thlarau thar (AI) anga thawk tura duan a ni a, internet-a kan hna hrang hrang, form fill-up te leh thil zawn (research) te chu kan aiawhin mahniin a thawk thei tawh dawn a ni. Tunah hian preview version-in an tlangzarh tan a, internet hman dan tura hmasawnna nasa tak a ni.
He AI thar hi Chrome window chung lama ‘Gemini’ button awm sa atang khan a hman theih a. A hma ang lo takin, tunah chuan screen sir (Sidepanel) ah a rawn inhawng thin dawn a, hemi hmang hian web page kan en mek lai pawhin Gemini nen kan inbe thei tawh dawn a ni. Chu mai bakah, Gmail, Calendar, YouTube, Maps leh Google Shopping te nen thlunzawm a ni a, Sidepanel atang hian kan email te pawh kan khawih thei nghal vek a ni.
‘Auto Browse’ hi tun tuma an thil thar phawkphawrh ber a ni a, he agent hian kan aiawhin mouse leh keyboard hmanga kan tih tur ang zawng zawng a thawk thei a ni. Entirnan, in kan zawng a nih pawhin, AI hian tab hrang hrang a hawng anga, a tha ber a thlang chhuak thei dawn a ni. AI hna thawh mekna tab-ah te chuan ‘sparkly’ icon a lang ang a, duh chuan hna dang kan thawhsan thei bawk a ni.
Amaherawhchu, he thil thar hi a thlawna hman theih a la ni rih lo a, AI Pro leh AI Ultra subscribe-tu te chauh tan a la ni. Pro subscriber-te chuan ni khat atan hna 20 an thawhtir thei a, Ultra subscriber-te chuan hna 200 thleng an thawhtir thei thung. Privacy lamah pawh Google chuan hma la nghalin, thil lei dawnah te pawh a thawk tupa (human) ngeiin a tawpna ‘confirm’ a ngai thin dawn a ni.