Harry Kane-a’n kum 2023-a Bayern Munich a zawm khan, mi tam tak chuan trophy chawi tura kum tlemte chauh Germany-ah hian a awm an ring a, Premier League-a kir leh vat turah an ngai deuh vek a ni. Kane hian Alan Shearer-a’n Premier League goal thun hnem ber record a siam chu vawm thliak turin goal 48 chauh a mamawh tawh a, mahse a thil tum a thlak danglam ta deuh niin a lang. Kane tan hian mimal record aia pawimawh zawk chu Europe club lian leh ropui berte zinga mi Bayern Munich-a hnu hma ropui tak hnutchhiah a ni tawh zawk a ni.
Bayern Munich-a sport lam hotu lu ber, Max Eberl chuan club leh Kane hian an contract thar chungchang an sawi dun mek tih a tarlang a. Kane-a contract neih lai hi kum 2027-ah a tawp dawn a, thlasik transfer emaw nipui transfer emaw hmaa an inrem lo a nih chuan Bayern hian hlawkna nei lova an chhuahtir mai an hlau a ni. Eberl chuan, ‘Harry kan be mek a ni,’ tiin thil thleng mek chungchangah hian a phur hle tih a tarlang a, Kane-a’n chhuah a duh loh chuan hma deuh zawka inremna siam an tum hle.
Germany-ah hian Kane-a’n hmun nuam a ti hle a, Robert Lewandowski-a record pawh a um mek a ni. Kane hian tun thlengin Bayern tan game 126 khelhah goal 119 a thun tawh a, a thun hnem dan hi a mak hial zawk a ni. Season khata Bundesliga-a goal thun hnem ber record, Lewandowski-a’n goal 41 a lo thun tawh chu khum tumin a bei mek a, tun season-ah chauh pawh hian game 19 khelhah goal 21 a thun tawh a ni. Goal thun chauh ni lovin, a thiante tan hun tha siamsakah pawh Kane hi a thawhhlawk hle a, midfielder anga hnung lama rawn tlaka ball vawrh chhuah lamah pawh hmuh tur a awm fo a ni.
A nupui Kate leh a fate pali - Ivy, Vivienne, Louis, leh Henry-te pawhin Munich khawpuia nun chu nuam an ti hle tih tarlan a ni. English player dang Michael Olise leh Jamal Musiala-te nen pawh an inkawm ngeih hle a, club chhungah Kane hian mi zawng zawng nuna inlaichinna tha a nei hneh hle. Tawng lamah harsatna nei deuh mah se, Munich-a a nun chu thlamuang tak leh hlim takin a hmang mek a, Bayern tan Bundesliga title leh Champions League trophy chawi chu a thil tum lian ber a la ni reng a ni.