Pop star hmingthang Harry Styles-a hian kumin nipui laia Wembley Stadium-a a concert neih tur chu zan hnihin a pawtsei leh a, a vaiin zan 12 zet he hmunah hian a inlan dawn ta a ni. He hma lakna thar hian kum khat chhunga he stadium-a concert nei tam ber record a siamtir dawn a, Coldplay-in zan 10 an neih leh Taylor Swift-in amah chauha zan 8 a neih tawh record-te chu a khum dawn a ni. He concert-ah hian fan maktaduai khat chuang an tel rin a ni a, a hmun enkawltu lam pawhin an stadium chanchina thil chhinchhiah tlak tak a nih tur thu an sawi.
Mahse, he concert ‘Together Together’ tour ticket man sang lutuk erawh fan-te zingah sawi a hlawh hle. Ticket man hi £44.10 (£4,800 vel) atanga £466.25 (£50,000 chuang vel) inkar a ni a, social media lamah fan tam tak chuan an lungawi loh thu an chhuah hlawm. Kum 2023-a he hmunah hian Styles-a hi inlan tawh mah se, tun tumah hian a ticket man sang ber chu £140 (Rs 15,000 chuang) zetin a to zawk tawh a. Hei hi khawvel puma tour hmingthang man sang chho zel nena inmil a ni.
Styles-a tour kalphung hi thlak hle a ni a, khawvel khawpui hrang hrang 50 chuanga kal kual tawh loin, khawpui sarih chauh tlawh a thlang tawh a ni. Amsterdam, London, São Paulo, Mexico City, New York, Melbourne leh Sydney-ah te chauh inlanin, hmun khatah zan tam tak a nei zawk dawn a. New York-ah phei chuan Madison Square Garden-ah thla khat chhung (zan 30) a awm dawn a ni. Hei hian khawpui danga cheng fan-te tan zin senso leh riahna senso a ti-pung hle a, fan-te zingah sawisel a hlawh phah a ni.
Hetiang harsatna leh lungawi lohna te a awm chung pawhin, ticket lei tum an tam em em a, pre-sale lai pawhin mi sang tam tak internet lamah lei turin an intlar. Styles-a hian fan-te lungawi nan ticket hralh pakhat zela £1 chu UK-a music band thar leh hmun te zawka concert-na hmun (small venues) tanpui nan a hlan dawn tih a puang a ni. He thil hi music industry dinhmun chhe zel chhan chhuahna tura a hmalakna pakhat a ni bawk.