United States-ah President Donald Trump-a kaihhruai sawrkarin ram pawn lam atanga dan lova lut (illegal immigrants) hnawhchhuah hna a kalpui mek laiin, Immigration and Customs Enforcement (ICE) agent-te chet dan chu mi tam takin an thlir thup tawh a. BBC podcast ‘Americast’-ah an tarlan danin, tun hnaiah heng agent-te hian an thuneihna hman piah lamah dan an bawhchhia em tih chungchangah rinhlelhna leh sawiselna a nasa hle a ni.
Kar hnih kalta khan Minneapolis khawpuiah kum 37-a upa Renee Nicole Good chu ICE officer pakhatin a kap hlum a, hei hian mipuite lungawilohna a chawk tho nasa hle. Minneapolis khawpui chhungah hian ICE duh lohna kawng zawh leh nawrhna chi hrang hrang a la thleng reng a. Vice President JD Vance pawhin Minneapolis-a a tlawh tum khan, Democrat-te chu Trump-a ruahmanna thlawp turin a sawm hial a ni.
ICE Director hlui John Sandweg chuan agent-te thlan dan leh an hnathawh kawnga enkawlna (vetting and recruitment) chungchangah ngaihdan a thawh a. Trump-a’n tun hnaia ram danga lo lutte hnawhchhuah nana dollar tluklehdingawn tam tak a hman hian ram pumah nghawng thui tak a neih theih thu a sawi bawk. He thuneihna thar hi agent-te’n an remchan tawk anga an hman mai mipuite chuan an hlau hle a ni.
Trump-a sawrkar hian US chanchina mi tam leh thahnem ber hnawhchhuah (largest mass deportation) a tiam a, mahse tharum thawhna thleng hian mipui ngaihdan a ti danglam tan mek nia tarlan a ni. ICE agent-te’n an bitum tur dik tak an thlang em, nge ni a, an remit piah lamah an kal tawh tih hi tun hnaia America ram hruaitute leh mipuite inkara inhnialna lian ber pakhat a ni tawh a ni.