Intel chuan kum 2025 tarna (fourth quarter) chhunga an sum lak luh leh hralh chhuah dinhmun (earnings report) an tarlang a, an sum dinhmun hi a kal tluang thawkhat hle. Nimahsela, chip siam chhuah (wafer supply) kawngah harsatna an neih avangin, mipui hman tur computer processor lamah chip a daih loh hmel hle a, hei hian an processor thar chhuak tur ‘Core Ultra Series 3’ (Panther Lake) man a tihsan phah emaun, a vâng phah dâwn niin a lang.
Report-in a tarlan danin, Intel hi AI leh data center lamah an hlawk thawkhat hle a, hemi lama hman tur an chip siam chhuah hi 9 percent laiin a pung a ni. Chutih rualin, mipui hman tur (consumer products) lam, Core processor leh Arc GPU ang chi-ah erawh an hralh tlem thung a, 7 percent laiin a tlahniam a ni. Intel CFO David Zinsner chuan an chip siam chhuah theihte hi pawisa lak luhna tam zawk (data center) lamah an dah hmasa (prioritize) rih dâwn tih a sawi a, hei hian consumer market-ah nghawng a nei dâwn a ni.
Intel-in chip siam chhuahna khawl thar leh process thar (18A process) an hman mekah hmasawnna awm viau mah se, an beisei ang thalin chip ‘tha’ (yield) an la siam chhuak hnem thei rih lo a ni. Intel CEO Lip-Bu Tan chuan thla tin 7-8 percent velin hmasawnna awm mah se, an beisei ang dinhmun an la thleng lo tih a sawi. Tun hnaia report hrang hrangin a tarlan danin, an chip siam chhuah zinga 10 percent vel chauh hi a tha tling tura beisei a ni rih a, hei hi harsatna lian tak a ni.
Intel chuan kum 2026 tan tir lam hi an tan hun khirh ber a nih an beisei a, kum chanve velah chuan chip siam chhuah pawh a hnianghnar chhoh leh an beisei thu an sawi. Chip thar tur ‘Nova Lake’ pawh kum 2026 tawp lamah peih hman an tum a, hei hi laptop leh desktop-ah pawh hman theih tur architecture thar a ni dâwn a ni. Chutiang a nih rualin, tun hnaiah erawh Intel processor thar lei tumte tan chip a vâng dâwn avangin nghah deuh emaw, a man sang deuh dawn emaw a ni hmel hle.