Iran ram khawpui Tehran leh a chhehvelah sorkar laka lungawi lohna lantirtute chu sorkar sipaiten nunrawng takin an bei a, hemi vanga nunna chan zat hi mi 6,000 chuang zet an tling tawh nia hriat a ni. He lungawi lohna hi nikum December ni 28 khan ram chhung sum leh pai dinmun chhia vanga intan kha a ni a, mahse a hnuah sorkar thlak danglam phuttu zinga mi tam tak an tel chho leh a, Iran chanchina sorkar laka helna thalo ber pawl a ni ta a ni.
Human Rights Activists News Agency (Hrana) chuan tun thleng hian mi 6,159 zet an thih tawh thu an nemnghet a, heng zingah hian naupang 92 leh sorkar hnuaia thawk mi 214 an tel a ni. Norway-a awm Iran Human Rights (IHR) group phei chuan thi zat hi mi 25,000 pawh an pel thei tih an sawi a. Sorkar sipaiten silai mu tak (live rounds) leh silai mu terek (pellets) hmangin mipui an kap chiam a, a bikin hmai leh mit te an tinzawn thin tih report a ni.
Nawrhzuartu zinga pakhat Parisa chuan, ‘Hmain deuhva nawrh kan neih te kha chuan hmelhriat thi kan nei ngai lo a, mahse tun tumah hi chuan ka thiante zingah mi 13 zet an thi tawh a ni,’ tiin a sawi. Tehran khawpui hospital phei chuan darkar tlemte chhungin mit hliam nei mi 70 chuang an admit tih an sawi a, hengte hi pellet gun-a kahna hliam vek an ni. Sorkar chuan ram chhung internet a tihthawm (shutdown) avangin thil thlen dan hriat a har hle a, mahse video leak chhuak leh witness te sawi danin sorkar thiltih hi a nunrawng hle.
Sorkar thiltih dang lungchhiatthlak deuh chu thi tawh te ruang an chhungte hnena an pe duh lo hi a ni. Ruang an lak duh chuan sorkar hnenah ‘billion tomans’ (US dollar 7,000 chuang) pek emaw, a nih loh leh an mi thi tawh chu nawrhzuartu ni luvin sorkar sipaia tel, firfiaka beitute vanga thi ang (martyr) a record turin an nawr lui thin a ni. Hei hian sorkar thiltih vanga thi zat a tihniam a, mipui hmai a hup sak a ni.