Iran sorkar laka lungawilohna lantirtu mipui-te chuan an sorkar venhimna sipai-te’n an sawisak hnuah damdawi in pan lovin thurukin enkawlna an zawng tih hriat a ni. Mipui-te hian damdawi in an pan a nih chuan sorkar sipai-te’n an man nghal zel avangin, mi inah emaw, doctor thuruk-te hnenah emaw hliam enkawlna hi an zawng a ni. Isfahan khawpuia Tara (hming thlak) chuan BBC hnenah sawiin, ‘Damdawi inah min hruai suh u’ tiin a hliam enkawltu-te a ngen hial tih a sawi a, an thlabau hle a ni.
Iran-a tharum thawhna thleng hi a nasat hle avangin a chanchin dik tak hriat a har hle a, mahse Human Rights Activists News Agency (HRANA) chuan tun hnaiah mi 6,301 an thih tawh thu a tarlang. Heng zingah hian protest-a tel mi 5,925, naupang 112, mipuia tel ve mai mi 50 leh sorkar hnuaia thawk mi 214 an tel a ni. Hliam tuar hi mi 11,000 chuang an awm bawk a, heng mite hian man an hlauh vangin damdawi in an pan duh lo tlangpui a, sorkar chuan internet an tihtawp vek avangin chanchin hriat a harsa lehzual a ni.
Damdawi in-a thawk doctor leh nurse-te chuan sorkar sipai-te’n damdawi in-a hliam tuar lutte chanchin an vil reng thu an sawi a. Tehran khawpuia surgeon Nima chuan darkar 96 chhung chawl lova zai a ngaih thu leh, zai lai pawha an tah hial thu a sawi. Hliam tuar tam tak chu silaichi mu (birdshot) vanga hmai leh taksa hmun hrang hranga hliam an ni a, mit hliam tuar mi 700 chuang Farabi Eye Hospital-ah enkawl an ni bawk. Doctor-te chuan an damlo-te hian an nihna dik tak (ID number) hman an hlauh thu leh, engtik lai pawha sorkar sipai-te’n an in an rawn luhchhuah an hlau reng tih an sawi.
Hliam tuarte enkawltu doctor-te pawh sorkar sipai-te hian an bitum mek a, doctor panga chuang man an ni tawh tih Iran Human Rights (IHR) chuan a sawi. Qazvin khawpuia surgeon Dr. Alireza Golchini pawh hliam tuarte a enkawl vanga man niin, ‘Pathian hmelma’ (moharebeh) anga puh a ni a, he thil hian thihna hremna a thlen thei hial a ni. Sorkar thuneitu-te chuan mi 3,100 vel an thih thu leh an tam zawk chu sorkar sipai-te an nih thu an sawi thung a, mahse thil thleng dik tak chu a rapthlak hle tih hmuh theih a ni.