Khawvel puma content creator lâr IShowSpeed (Darren Watkins Jr) chu West Africa ram, Ghana khua leh tui nihna, passport pek a ni dawn ta. He thu hi a Africa tour ‘Speed Does Africa’ tih, ram 20 zet a tlawh kualna a zawh hnu deuh lawkah Ghana sorkar hian a puang a ni. Ghana hi a ram tlawh kual zinga a hnuhnung ber dawttu a ni a, he tour hian Africa chanchin leh an hnam nun mawi tak takte khawvel hriatah a pholang nasa hle.
Ghana Foreign Minister, Samuel Okudzeto Ablakwa chuan Watkins-a passport hi an pawmpui tawh thu a sawi a, ani hi ram tana ‘ambassador’ hna thawk thei tur khawpa mi tangkai a nih thu a sawi bawk. Social media-ah Minister hian IShowSpeed-a leh Ghana inzawmna chu thil hmuh theih leh hnial rual loh a nih thu a tarlang a. IShowSpeed pawh hian a hma khan a nu chu Ghana mi a nih thu a lo puang tawh bawk a ni.
Ghana a tlawh chhung hian Watkins hian a hmun hmingthang tak tak a tlawh a, naming ceremony-ah telin ‘Barima Kofi Akuffo’ tih hming thar pawh a vuah a ni. Local kente cloth silin he hming hi a dawng a, amah pawhin Ghana-ah chuan ‘inah awm’ ang maiin a inhriat thu a sawi. Ghana sorkar hian an rama hnam hrang hrang ram pawna darhzau tawhte (diaspora) nena inzawmna thuk zawk neih tumin hma an la nasa hle a, hmanni lawk khan Stevie Wonder pawh Ghana khua leh tui nihna hi an lo pe tawh a ni.
Kum 21 mi Watkins hian YouTube-ah subscriber maktaduai 50 chuang a nei tawh a, a Africa tour hian a hlutna a tivawng sang hle. Ni 28 chhungin Nigeria, South Africa, Morocco, leh Ivory Coast te a tlawh a, hnam hrang hrang nunphung a hmuh bakah activities hrang hrangah a tel kual a ni. Rolling Stone magazine chuan ‘most influential creator of 2025’ atan a thlang a, Forbes-in a hausakna hi $20m vel ni hialin an chhut bawk a ni.