US immigration agency (ICE) te chuan kumin February ni 6-a Italy rama tan tur Winter Olympics-ah security lam pui turin agent-te an tirh dawn thu an nemnghet a. He thu hian Italy ram hruaitu leh mipui tam tak zingah lungawilohna nasa tak a chawk chhuak a, Milan khawpui mayor phei chuan he mite hi ram chhungah an lawm loh thu a sawi hial a ni.
He thutlukna hi Minneapolis khawpuia ICE agent-te’n mi pahnih an kahhlum hnu, boruak a san lai tak a ni a. Milan Mayor Beppe Sala chuan, ‘He thil hi tualthattu pawl (militia) ang mai an ni a… Milan-ah hian lawm an ni lo,’ tiin Italian radio-ah a sawi. ICE thupuangtu chuan security hna zawng zawng hi Italy thuneitute hnuaiah a awm vek dawn tih sawi mah se, Italian politics-ah erawh sawiselna a nasa hle.
Italy Interior Minister Matteo Piantedosi chuan a tirah US agent-te lo kal tur hi a hriat loh thu a sawi a, mah se ram dang delegation-te’n mahni venhimna tur an rawn keng thin chu thil pangngai a nih thu a sawi leh thung. Mah se, Minneapolis-a thil thleng video-te a darh nasat hnuah leh Rai TV reporter-te ICE agent-te’n an vau hnuah phei chuan lungawilohna hi a zual sauh a ni.
Tun tum Winter Olympics hi Milan-Cortina hmunah February ni 6 atanga ni 22 chhung hman a ni dawn a. US Vice President JD Vance leh Secretary of State Marco Rubio-te venhimna hna thawk turin ICE agent-te hi an lo kal dawn niin Governor Attilio Fontana chuan a sawi a. Mah se, opposition party-te chuan he thil hi Prime Minister Giorgia Meloni-i’n Donald Trump-a a hlauh vang leh a ruka a thlawp vanga thleng niin an sawisel bawk a ni.