Japan sorkar leh an space agency JAXA chuan an rocket thar ber H3 chu hlawhtling taka van boruaka vawrh chhuah a nih hnuah, a thil phurh navigation satellite ‘Michibiki 5’ chu a hloh tih an nemnghet ta. He thil thleng hi Japan Space Agency (JAXA) chuan uluk takin an zir chiang mek a, rocket fairing (a chung khuhna) a inhawng laia buaina thleng nia hriat a ni. He thil thleng hi Japan-in vanlam hmasawnna atana an hmalakna lian tak chu nasa takin a tikhaihlak thei a ni.
Thil thlen dan tarlan danin, rocket hi Tanegashima Space Center atanga kah chhuah a nih hnuah minute 4 velah a chung khuhna hi a inhawng a. Hetih lai hian rocket-a camera awmte chuan satellite chu a sawi (wobble) tih leh a tluk deuh tih an hmu a ni. Rocket thlawp tu (sensors) te chuan thlawhna chung lama satellite innghahna lai chu a nghing (vibrate) nasa hle tih an hmu bawk. Aerodynamic forces-te vanga thleng ni lovin, thlawhna inthlak (staging) laia buaina thleng a nih hmel hle bawk a ni.
JAXA chuan he buaina hian an rocket hman lai H3 ‘second stage’ pawh a khawih pawi tih an sawi a. Liquid hydrogen tank-ah pressure a tlahniam a, hei hian rocket engine chakna pawh 20 percent velin a tihniam a ni. Rocket hi van boruak hniam deuh (low-altitude orbit) thleng hman mah se, a thil phurh a hloh tawh bakah rei lo teah boruak lum vanga kang ralin a awm zui ta a ni. Satellite pawimawh tak, ton 5 laia rit hi Pacific tuipuiah a tla thla a, zawn chhuah leh ngaihna a awm tawh lo a ni.
He thil thleng hi Japan tana nasa taka hmalakna ‘Martian Moons Exploration’ (MMX) mission atan harsatna thlentu a ni thei dawn a. MMX hi Mars thla ‘Phobos’ atanga vaivut la tura ruahman a ni a, kumin October thla hian kah chhuah hman tum a ni. Japan sorkar leh JAXA chuan kumin chhung ngeia he rocket buaina hi chinfel hman an tum thu an sawi a, chuti a nih loh chuan an mission hian kum hnih dang a nghah leh a ngai hial dawn a ni.