Taiwan-a tlangval kum 20 mi pakhat chuan a dar leh a awm vela vun vung leh thak a neih avangin dermatology clinic a pan a. He natna hi thla khat zet a lo neih tawh hnuah pawh a dam thei lo va, a hnuah phei chuan a vun chu a lo dum deuh hlek (pigmented) bawk a ni. New England Journal of Medicine-a thuziak landan chuan, doctor-te’n a vun an endik hnuah he natna hi keto diet a zawm vanga lo awm a ni tih an hmuchhuak ta a ni.
He tlangval hian clinic a pan hma thla hnih vel khan ‘ketogenic diet’ a lo zawm tan a. He diet hi thau (fat) tam taka ei a, carbohydrate (thlum leh hriak lampang) ei tlemna a ni. Taksa-in energy atana glucose (sugar) a hman thin chu a lo tlem tak avangin, taksa chuan energy siam nan thau a hmang tan a, chu chu ‘ketosis’ an ti a ni. Ketosis a lo thlen hian liver-ah ‘ketone bodies’ a lo insiam a, chu chu energy atan taksa hmun hrang hrangah hman a ni thin a ni.
Ketogenic diet hi hriau (epilepsy) leh thau lutuk enkawl nan hman thin a ni a, mahse harsatna a thlen thei bawk. ‘Keto rash’ kher hi chu kum 1971 khan Japan-ah hmuhchhuah hmasak a ni a, a hming tak chu ‘prurigo pigmentosa’ a ni. He natna hi a vung a, a thak a, a hnuah a vun a tidum thei bawk. Doctor-te chuan ketone bodies hian vuna thawk ‘neutrophils’ (white blood cells) te a tibuai a, chu chuan inflammation (vun vung) a thlen niin an hmu a ni.
He natna hi a chhan chiang taka hriat la ni lo mah se, a enkawlna erawh hmuhchhuah tawh a ni. Tlangval hian kar hnih chhung ‘doxycycline’ (antibiotic) a ei a, a keto diet zawm lai pawh bansan tura hrilh a ni bawk. Chumi hnu kar khat velah chuan a vun vung leh thak zawng zawngte chu a reh leh vek tawh a ni. Doctor-te chuan hetiang diet zawm dawn hian fimkhur a pawimawh hle tih leh, doctor-te rawn hmasak thin a tul tih an sawi bawk a ni.