King Charles III chuan a thil thlir dan leh a hnathawh chungchang tarlanna documentary thar, ‘Finding Harmony - A King’s Vision’ tih chu Amazon Prime Video-ah thla thar hian a tichhuak dawn a. He film-ah hian Lalber hian khawvel leh mihringte hi thil hrang ni loin, inpawh tlat leh riral thei lo an nihzia a tarlang a ni. He documentary hi Nilaini hian Windsor Castle-ah tlangzarh a ni dawn a, hei hi Windsor Castle-a film premiere neih hmasak ber a ni hial dawn a ni.
He film-ah hian kum 1970-a King Charles-a’n kum 21 a nih laia thilsiam enkawl (environmentalism) chungchanga thu a lo sawi tawh te tarlan a ni a. Kum tam tak chhung sawiselnate lo tawk thin mah se, a thil thlir danah a din ngheh tlat thu he film-ah hian a sawi a. A hmain mi tam takin a thil thlir dante chu ‘atthlak’ (bonkers) tiin lo sawisel mah se, tun hnuah erawh mi tam takin thil nih dan tur dik tak (common sense) a lo sawi thin tih an pawm tawh zawk a ni.
He documentary-ah hian a thil thlir dante a taka a kalpui dan hrang hrangte tarlan a ni a. Ayrshire-a Dumfries House a tihtharah te leh Gloucestershire-a Highgrove-ah te Lalber hian a thil tumte a lo kalpui tawh dan kan hmu dawn a ni. Highgrove-ah phei chuan Lalber hi ar tlatna hmun ‘Cluckingham Palace’ tia a vuahah te ar-te chaw a pe lai hmuh tur a awm a. Lalber hian Pathian biakna leh thlarau lam thila a ngaihpawimawh dan te, hnam hrang hrangte nena an inpawh dan te pawh a tarlang bawk.
He film hi Kate Winslet-i’n a sawi (narrate) a ni a, Lalber hian a mimal nuna a ngaihpawimawh zualte tarlan a tum a ni. Lalber chuan a thu sawiah, ‘Maybe, by the time I shuffle off this mortal coil, there might be a little more awareness… of the need to bring things back together again’ (He khawvel ka chhuahsan huna mi tam zawkin kan thil tih tur leh kan nunphung hi siamrem a ngai a ni tih an lo hriat chhuah deuh deuh ka beisei a ni) tiin a beiseina a sawi chhuak a. He film hian thlir maktaduai chuangte chu khawvel enkawl kawngah nasa taka a chawh thawh a beisei thu a sawi bawk a ni.