Greater Manchester Mayor Andy Burnham-a’n Parliamentary by-election a chuh tur an dang chu Labour Party chhunga MP 50 vel an lungawi lo hle a, Party hruaitu Sir Keir Starmer hnenah lungawi lohna lehkha an thehlut. He by-election hi Gorton leh Denton bial atana neih tur a ni a, MP rualte hian Burnham-a hi he biala chakpui theihna chance tha ber anga an ngaih laiin party hruaitute hian an dang tlat a ni.
Lungawi lohna lehkha ziaktute chuan he thutlukna hi Reform UK party tan ‘thilpek hlu’ a nih thu leh, thlangtute hnena hmel dik lo lanchhuahtirtu a nih thu an sawi. Polling data hrang hrang atanga a lan danin, Burnham-a hi he biala hnehna chang thei tura rin ber a nih laiin, thutlukna siamtu National Executive Committee (NEC) chuan chhan tling tawk awm lovin a dang a ni tiin an sawi a, he thutlukna hi enfiah tha leh turin an ngen bawk a ni.
Sir Keir Starmer erawh chuan he thutlukna hi a thlawp tlat thung a, party resources - sum leh pai leh mihringte chu inthlan pawimawh zualah chauh hman tur a ni tih a sawi. Burnham-a’n inthlan a chuh a, a hneh a nih chuan Greater Manchester Mayor thar thlanna neih a ngai leh dawn a, chu chuan mipui sum £4.7m vel a heu tir dawn tih a tarlang bawk. Thutlukna hi NEC member-te chuan nasa takin an thlawp tih Housing Secretary Steve Reed pawhin a nemnghet.
Andy Burnham-a hi Keir Starmer-a hmun ruak thlang thei tur khawpa hruaitu tling anga ngaih a ni a, mahse chumi tur chuan Parliament-ah a luh leh a ngai a ni. NEC vote-ah hian member 10 zinga 8-in Burnham-a hi an dang a, Deputy Leader Lucy Powell chauhvin a thlawp a ni. Burnham-a chuan he thutlukna hi pawi a tih thu leh a hna (Mayor) chauh a ngaihtuah tawh tur thu a sawi a, mahse Labour party-in he thutlukna mipuia an puanzar danah a lungawi lo hle tih a tarlang tel bawk a ni.