Electronics siamtu lian LG chuan United Kingdom-ah subscription program thar ‘LG Flex’ an tlangzarh a. He program kaltlang hian mipuiten LG TV, soundbar, monitor, leh speaker-te thla tina pawisa chawiin an hawh (rent) thei dawn a ni. Kum khat, kum hnih, emaw kum thum chhung atan subscription hi a siam theih a, hawh rei duh apiang tan thla tina an chawi tur pawh a tlem deuh thei bawk a ni.
He service-ah hian thil hawh hun a tawp hian, a thar (upgrade) dil theih a ni a, emaw thla tina pawisa chawi chhunzawm zel emaw, a nih loh leh a thil hawh chu laksak tura dil theih a ni bawk. Entirnan, 83-inch OLED B5 2025 TV hawh duh tan thla khatah £277 (cheng 30,000 chuang) hial chawi a ngai thei a, hei hi thla khat chauh commitment nei duh tan a ni. Amaherawhchu, kum thum chhung atan a nih chuan thla khatah £93 (cheng 10,000 chuang) vel chawi a ngai thung ang.
Mithiamte chuan hetiang hawh hi thil lei aiin a thlawna pawisa hman ralna a nih thei hmel thu an sawi a. Entirnan, OLED B5 2025 TV hawh duh chuan kum thum plan-ah thla 27 hnuah a hralhna man (MSRP) a tling tawh dawn a, thla khata commitment nei tan phei chuan thla 9 hnuah a man aiin an chawi hnem tawh zawk dawn a ni. Chutih rualin, thil thar hman reng duh, upgrade ngun duh, leh sum vawikhat pheka sen nghal harsate tan chuan a remchang hle thung ang.
LG hian hetiang rental program hi Singapore leh Malaysia-ah pawh an lo kalpui tawh a. He thil an tih chhan ber chu kum tina electronics thar an hralh chhuah reng theih loh avanga sum lakluhna nghet (recurring revenue) an neih theih nan a ni. Tunlai hian HP leh NZXT ang tech company dangte pawhin printer leh gaming PC hawh theihna an kalpui mek bawk a, hei hi tech khawvela ‘rent instead of buy’ trend thar lo chhuak mek a ni.