Liverpool-a doctor lar leh hmingtha, Dr Faisal Maassarani leh a thawkpuite chuan raltlan (asylum seeker) te hman tur hotel siam nan mi 100 chuang an chenna atanga hnawhchhuah an tum avangin sawisel an hlawh hle. He doctor hian Merseyside huam chhunga GP surgery hrang hrang a enkawl bakah, kum 2009 khan mi harsa te tan charity ‘Care Merseyside’ pawh a din tawh a ni. BBC-in a chhui chianna a tihchhuah danin, Dr Maassarani-a kaihhnih company-te hian kum 2022 khan raltlan te enkawltu Serco nen thawhhona an lo nei tan tawh a ni.
BBC North West Investigations-in a tarlan dan chuan, Parliament Place-a cheng mipuite hnenah ‘fire safety’ thila hmanmawh vanga chhuak tura hriattirna pek an ni a. Mahse, he hriattirna hi raltlan 116 vel dah luh nana ralkhel hmanrua (ruse) mai a nih mipuite hian an ring a ni. Tenants-te hian an chhuah hnuah raltlan dah luh tumna a awm tih an hre miah lo a, sorkar (Home Office) atangin flat pakhat zelah thla tin pound 435 zel hlawh theihna tur ruahmanna a awm tih pawh an lo hre lo a ni.
Dr Maassarani hian he thilah hian a inrawlh loh thu leh ni tina building enkawlnaah thu neihna a neih loh thu a sawi a. He thila inrawlh company ‘Schloss Roxburghe Holdings’ (SRH) hi Isle of Man-a inziaklut a nih bakah, a share neitu pawh mimal hming lang lo tura foundation pakhat hnuaia awm a ni. Amaherawhchu, he GP hian he company-ah hian inrawlhna a nei tih chhui chhuah a ni a, raltlan te dahna tur ruahmanna chungchang pawh a hriatpui ngei tih tarlan a ni. He thilah hian solicitor Michael Murphy pawh a inrawlh nia hmuh a ni a, ani hi raltlan dahna tur thila hma latu pakhat a ni.
Liverpool Riverside MP, Kim Johnson chuan he thil hi ‘a tha tawk lo’ tiin, raltlan te dahna tur hmun zawnna leh sorkar contract pek chhuah danah chhui chianna leh endikna khauh zawk a ngai a ni tih a sawi. MP chuan mimal tana hlawkna tur vanga mipui harsatna siam chu pawm chi a nih loh thu a sawi bawk. Tunah hian Parliament Place-a chengte hi an chhuak ta rih lo a, raltlan dah luh tumna pawh chu tihtop a ni rih a, ‘fire safety’ chungchanga hna thawh tur an sawi pawh chu a hnuah hmuh tur a awm zui ta chuang lo a ni.