Manchester United wing-back thiam tak Patrick Dorgu chu Pathianni-a Arsenal an hneh tuma a hamstring a hliam avangin kar eng emaw zat a chawl dawn tih hriat a ni. Kum 21 mi, Denmark international hi an khelh tawp lamah a inhliam a, an interim head coach Michael Carrick chuan ‘cramp’ mai a nih a lo beisei tawh a, mahse a aiin a thuk zawk tih hmuh chhuah a ni. Tunah hian a hliam hi endik mek a ni a, a chawlh rei tur erawh ala hriat chiah loh thung.
Dorgu hi Manchester United-in Arsenal 3-2 a an hnehna goal hnihna pet luttu a ni a, a hliam hma hian a khel tha hle. Italian club Lecce atanga United a zawm hnuah Carrick-a hnuaiah left-sided attacking role-ah hma a sawn hle a, kumin hian Manchester City an hneh tumin goal a lo thun tawh bawk a ni. A in-form lai tak a nih avangin United tan a chawlh tur hi hloh liau liau a ni a, a hmun ruak hi hnawhkhah a harsa viau ang.
United hian March thlaa international break hma hian Premier League game pariat lai an la nei a, hemi hnu hian Dorgu hi Denmark tana World Cup play-offs khel turin beisei a ni bawk. United coach Michael Carrick chuan player naupang leh talent nei tha tak a nih avangin a hliam chungchangah hian fimkhur a ngai tih a sawi a, team tana mi pawimawh a nihna a lan chhoh mek lai a nih avangin hliam dang lakah pawh an kalsan hma a ngai a ni.
Dorgu a chawlh takah chuan United tana goal thun hnem tak Matheus Cunha chuan hmun pawimawh a chan leh a rinawm tawh a ni. Cunha hi tun hnai game hnihah chuan substitutes bench atangin a rawn lut thin a, Arsenal lakah pawh chakna goal a thun nghe nghe. Manchester United thuneitute chuan Dorgu hi uluk takin an thlithlai reng dawn tih an sawi a, fans-te pawhin dam leh thuai turin an duhsak hle a ni.