Khawvela technology lama thuneitu lian Meta chuan Instagram, Facebook leh WhatsApp hmangtute tan premium subscription (thla tina pawisa chawi ngai chi) kalpui a tum thu a puang a. He hma lakna thar hi AI hmasawnna thar ber berte hman theihna tura ruahman a ni a, user-te tan hmanraw thar tam tak a rawn chhawp chhuak ang. He subscription thar hnuaiah hian heng social media platform-te hmanpui ber chu a thlawna hman theih a la ni chhunzawm dawn thung a ni.
Ruahmanna thar hnuaiah hian, Meta chuan AI theihna thar leh zau zawk bakah ‘Vibes’ video generation app thar hman theihna a pe dawn a ni. Vibes app hi Meta-in September thlaa a puan tawh kha a ni a, AI visual creation hmanrua hmangin mi mal ngaihtuahna leh thil thar (ideas) te chu lemchanah an chantir thei dawn a ni. Meta hian tun hnaiah AI hmasawnna hi an ngaihpawimawh em em avangin, premium service hmangtute chu he technology thar ber hi hman hmasaktir an tum hle a ni.
Meta hian he hma lakna atan hian December thlaa dollar tluklehdingawn 2 zeta an lei tak ‘Manus’ AI startup chu an chhawr dawn bawk a. Manus hi Singapore-a hmunpui nei, mahse China-a bul tan a ni a, autonomous AI agent siam lama hmingthang an ni. Manus-a thawktute hian Meta AI team zawmin, mihring kuta innghat lutuk lova trip planning leh presentation siam ang chi hna hautak tak tak mahnia thawk thei tur AI agent siam an tum a ni. Amaherawhchu, China sawrkar chuan he deal hi a ram hnam himna leh technology export dan a palzut leh palzut loh enfiah tumin hma a la mek bawk.
Hei hi Meta-in paid service a kalpui vawi khatna a ni lova, kum 2023 khan ‘Meta Verified’ blue tick service a lo tlangzarh tawh a ni. Kum kal ta khan Facebook-ah link share zat bituk (link sharing limit) pawh test a lo nei tawh a, thla tina pound 9.99 chawi a, link pahnih aia tam share theihna pawh a lo enchhin tawh bawk. Tun tuma premium subscription an kalpui tur hi social media hmangtute tana experience thar leh hmanraw thawk tha zawk pe tura an hma lakna pakhat niin an tarlang a ni.