Social media hman nasat vanga naupang leh thalai tam takin rilru lama harsatna an neih phah nia sawina thubuai chu tunkar hian court-ah ngaihtuah tan a ni a. He thubuai (lawsuit) hian Meta (Instagram leh Facebook neitu) leh YouTube-te a nghawng dawn a ni. Hei hi ‘bellwether case’ tia koh niin, he thubuai hian social media platform dang tam tak chungchang leh hmahun a hril thei dawn a ni.
Thubuai thehluttu hi kum 19 mi K.G.M. a ni a, a kum 6 atangin YouTube a en tan a, kum 11 a nihin Instagram a hmang tan bawk. Social media platform-ten hmasawnna tura an hman ‘infinite scroll’ leh ‘autoplay’ te hian naupangte rilruah ngawlveina an siam niin a sawi a. Hei hian amah ngei pawh depression, anxiety, leh mahni intihlum duhna hial a neih phah nia sawi a ni a. He hmeichhia hian social media company-te hnen atang hian zangnadawmna tam tak a phut a ni.
He thubuaiin a tarlan fiahna (evidence) pawimawh tak pakhat chu Meta hnathawktute inbiakna a ni. Dokument unsealed-ah chuan Meta hnathawktu pakhat chuan ‘IG is a drug’ (Instagram chu damdawi ruihlo ang a ni) tiin a lo sawi tawh a, Mark Zuckerberg-a pawhin kum 2017 khan thalaite chu an app-ah an tan reng theih nan hmalak a pawimawh thu a lo sawi tawh bawk a ni. Google pawhin naupangte chu damchhunga YouTube hman tir reng dan kawng an lo zawn thu dokument-ah hian a lang bawk.
Court-ah hian judge Carolyn B. Kuhl chuan social media company-ten thubuai hi hnawl (dismiss) tura an dilna chu a lo hnawlsak tawh a, jury-te hmaa ngaihtuah turin a rel a ni. TikTok leh Snapchat pawh he thubuai lakah hian an tel tawh a, mahse an ni hi chuan court thlen hmain pawisa pein an inrem (settle) tawh thung a ni. Meta leh YouTube-te erawh hi chuan an thiam lohna a awm loh thu sawiin court-ah hian an la inkhing chhunzawm dawn a ni.