Facebook neitu Meta hotu lian Mark Zuckerberg chuan, tun hnaia artificial intelligence (AI) hmanruate an changkan tak em avangin, hna hmawr bawk turin mi tam tak mamawh tawh lovin, engineer pakhat chauh pawhin team pum hnathawh a thawk thei tawh tih a sawi. Nilaini khan Meta-in kum 2025-a an sum lakluh leh hman dante an thlir honaah Zuckerberg hian he thu hi a sawi a, kum 2026 hi an hnathawh dan a danglam hlawkna tur kum a nih a beisei thu a sawi bawk a ni.
He thuchhuah hian tech khawvelah sawi zui a hlawh hle a, a chhan chu hnathawktu ban lehna tur ‘layoffs’ a kawk thei tlat a ni. Zuckerberg-a sawi dan chuan, hman deuh khan project lian tak tak thawk turin team lian tak mamawh thin mah se, tunah chuan mi thiam tak pakhat chauh pawhin chung hnate chu a thawk thei tawh a ni. Meta hian kumin chhung pawhin an Reality Labs division atangin hnathawktu eng emaw zat an lo ban tawh a, hei hi an metaverse leh AI lama an hma lakna kawnga thil thleng a ni.
Meta hian AI lama hma hruai tumin sum tam tak an hmang a, nikum chhung ringawt khan dollar tluklehdingawn 77 (£55bn) zet he lamah hian an thil (infrastructure) siam nan leh hmasawnna kawngah an hmang a ni. Kumin chhung hian nikuma an sum hman aia tam (a let hnih) hman leh an tum thu an sawi bawk a. Meta share hlutna pawh New York-ah 7.5% zetin a sang chho a, mahse an sum hman nasat em avang hian an hlawkna (profit margin) erawh a hniam phah hret a ni.
Tech khawvel thiamna leh sumdawnna lama thiam bik tam tak chuan AI-ah hian sum hman nasat lutuk chu thil hlauhawm (bubble) a nih thei thu an sawi ve bawk. Cisco Systems hotupa Chuck Robbins chuan AI hi internet aia a lian zawk thei a nih rualin, tunah hian a ‘bubble’ lai a nih avangin company tam tak chu an ding chhuak lovang tih a hlauhthawn thu BBC a hrilh a. JPMorgan Chase hotu Jamie Dimon leh Google CEO Sundar Pichai pawhin AI lamtah hian ‘irrationality’ a awm thu an lo sawi tawh bawk a ni.