Mexico President Claudia Sheinbaum chuan K-pop band lar tak BTS-te concert chu an rama neih belh turin South Korea President hnenah ngenna a thlen tih a sawi. BTS-te hian kum li hnuah an tour hmasa ber an nei leh dawn a, Mexico khawpui Mexico City-ah hian kumin May thlaah show pathum nei tura ruahman an ni tawh a ni.
He concert ticket hi minute 40 chhung lekin a zo vek a, thalai tam takin ticket an hmuh loh phah a ni. Sheinbaum chuan Thawhtanni khan a lehkha thawn chungchang hi sawiin, ‘Korea President hnenah lehkha ka thawn a, chhanna ka la hmu lo nain, chhanna tha tak ka beisei a ni,’ a ti. Mexico hian BTS fans tam tak an nei a, Spotify record-ah pawh K-pop ngaithlatu tamna ram pangana an ni hial a ni.
Ticket hralhna chungchangah hian thil fel lo a awm nia hriat a ni a, Ticketmaster leh ticket hralh chhawnna (resale platforms) dangte chuan man bituk loh (dynamic pricing) an hman vanga rinhlelh an ni. Ticket hrim hrim hi pesos 1,800 atanga 17,800 ($100 - $1,030) inkar a ni a, mahse hralh chhawnna lamah chuan pesos 92,100 ($5,000 chuang) hialin an hralh tih hmuh a ni. Mexico consumer watchdog chuan StubHub leh Viagogo-te chu an thil tih dan dik loh vangin hremna an pe hial a ni.
BTS-te hian kum 2022 June thla atang khan group angin music an la siam leh lo a, member-te hi an mahni mimal hnaah an buai bakah sipai hna an thawk bawk a ni. Tunah hian khawvel hmun hrang hrangah tour neih an tum leh a, April ni 9-ah South Korea-ah an tan dawn a ni. He tour atang hian dollar tluklehdingawn khat chuang an lak luh hmel hle a, khawvel pumpui thalaiten an nghakhlel hle a ni.