Kum 30-na tling ta Mobo Awards 2026 neih turah, Olivia Dean, R&B group Flo leh Nigerian singer Tiwa Savage-te chu perform tura thlan an ni tawh tih an dintu Kanya King chuan a puang. He hun hi Manchester-a Co-op Live-ah kumin March ni 26 hian neih a ni dawn a, Manchester khawpui hian he lawmman semna ropui hi a vawi khatna atan a thleng dawn a ni.
Mobo founder leh CEO Kanya King chuan performers-te chungchang hi sawiin, ‘bold, brilliant and rooted in creative truth’ tiin a hrilhfiah hlawm a. London-a piang singer Olivia Dean tan hian zan chhinchiah tlak tak a ni dawn a, a chhan chu a album thar ‘The Art Of Loving’ hmangin nomination pali (4) zet a hmu a, ‘Album of the Year’ lawmman dawn pawh a beisei hle a ni. He category-ah hian British trio Flo-te debut album ‘Access All Areas’ nen an innuai dawn a ni.
He hun ropui tak hi hip-hop star lar Eve leh comedian Eddie Kadi-te'n an host dawn a. Eve tan chuan hetiang hun host hi a vawi khatna a ni dawn a, Eddie Kadi erawh chu a vawi thum nan a inlar leh dawn a ni. Eve chuan a phur thu sawiin, Atlantic tuipui kân mah se, rimawi leh culture an hmangaihna chu an inremsiamna leh an inthlunzawmna a nih thu a sawi bawk. Eddie Kadi pawhin he hun legendary-ah hian a tel leh thei tur chu a chhuan thu leh surprise tam tak a awm dawn thu a sawi.
Mobo Awards 2026-ah hian Little Simz leh Central Cee-te pawhin nomination tam tak an hmu a. Little Simz hian a album ‘Lotus’ hmangin nomination 4 a hmu a, Central Cee pawh a studio album hmasa ber ‘Can’t Rush Greatness’ hmangin ‘Album of the Year’ category-ah a lang bawk. Performers dang leh special honour dawng turte chu hun reilotê hnuah puanzar leh an ni ang.