England all-rounder hmingthang Moeen Ali chuan cricket khelh a chawlhsan tur thutlukna a siam tawh chu thulh leh-in, Yorkshire County Cricket Club-ah T20 Blast khel turin a zawm thar. He kum 38 mi hian thla liam taa Birmingham Bears tan a khelh zawh khan khelh chawlhsan a tum thu a lo puang tawh a, mahse White Rose tana khelh theihna hun tha hi bawhpelh a hreh leh ta zawk a ni.
Yorkshire club nena inremna an neih hian Moeen-a hian club hmasawnna leh vantlang nena inlaichinna tha zawk an siam mek chu a fak hle a. Kum nga kalta khan Yorkshire-ah hian chi leh chi inthliarna (racism) chungchangah Azeem Rafiq chuan sawi chhuah a lo nei tawh a, chutih hun lai khan Moeen-a hian a thlawp hle a ni. Tunah erawh club chu an danglam tawh hle tih a sawi a, khawtlang nena inpawh leh hmasawn tura hmalakna an neih mekte chu hmuhnawm a tih thu a tarlang bawk.
Cricket-a thuneitu ECB hian tualchhung player-te zu in nasa lutuk chungchang an enfiah mek lai hian, Moeen-a chuan elite level-ah chuan zu hi thil pawi tak a nih thu a sawi bawk. Muslim sakhua vawmtu rinawm a nih angin amah hian zu a in ve lo va, ‘Elite level-ah chuan thil hi a dik thlap a ngai a, i theihna sang ber i hlan duh a nih chuan zu in hi thil pawi tak a ni,’ tiin a sawi. Football-ah pawh inkhelh hmain zu an in mang tawh lo tih sawiin, cricket-ah pawh kum li kum nga chhungin chutiang chu an thleng ve mai a rin thu a tarlang.
Yorkshire hian vawi khat mah T20 Blast title an la la ngai lo va, Moeen-a bakah hian Afghanistan bowler Naveen Ul-Haq, Australian AJ Tye leh Netherlands all-rounder Logan van Beek-te pawh an la thar a ni. Moeen-a hi kum 2027 thleng contract pawhsei theihna hun pek a ni bawk a, Headingley-a inkhelh chu a chak tawh hle tih a sawi a. Cricket a chawlh hunah coaching lama luh nghal a tum thu sawiin, Yorkshire-a a awm chhung hian player naupang zawk tana theihtawp chhuah a inhuam thu a sawi bawk a ni.