NASA-in Artemis mission hmanga thlaa mihring tirh leh a tumna kawngah, hmanrua pawimawh tak ‘spacesuit’ chungchangah lungawi lohna a awm mek. NASA astronaut hlui, Kate Rubins-i chuan thlaa hman tur spacesuit thar, Axiom Space-in an siam chu a la ‘tha tawk lo’ (not great right now) tih a sawi a. Suit thar hi Apollo hun laia hman aiin a rit zawk hle a, thlaa hna han thawh velna atan a la buaithlak hle niin a tarlang.
Rubins-i hi International Space Station (ISS)-ah ni 300 chuang hun hmang tawh a ni a, vawi ruk zet spacewalk pawh a nei tawh a ni. A sawi dan chuan ISS-a floating (len vel) leh thlaa kal chu a inang lo hle a. Thlaah chuan gravity (hnuhipna) tlem a awm avangin leh suit a rit bakah chet vel a harsa zawk a, chu chu marathon vawi hnih tlan ang hialin taksa tan a hahthlak dawn a ni. ‘He thil hi taksa tan fiahna nasa tak a ni a, ISS-a kan hman thin ang a ni lo,’ tiin National Academies panel hmaah a sawi.
Suit thar hi pound 300 chuang a rit a ni a, hei hi Apollo suit pound 185 aiin a rit zawk hle. Axiom Space-in an siam hi hmabak a la ngah hle a, thlaa lung char tur ringawta han kun pawh a harsa hle a ni. Center of gravity a ruan loh avangin astronaut-te an tlu fo thei bawk niin Rubins-i chuan a tarlang. Suit chet vel (flexibility) chungchangah pawh harsatna a la tam a, thlaa kalna tur atana ‘horrible’ (tha lo) lutuk lo deuh kan hmuh hian kan lawm leh em em thin a, mahse a takah chuan a la tha tawk lo hle a ni tiin a sawi belh bawk.
NASA astronaut dang Mike Barratt chuan suit hi a siam chhoh mek a ni a, hun a la neih deuh avangin siam that a ni zel ang tiin ngaihdan tha zawk a nei ve thung. Amaherawhchu, 2028 hma chuan Artemis III mission hi a hlawhtling hman kher lo maithei bawk a ni. Hemi hmain thlaa kalna tur leh hmanrua dangte pawh endik mek zel a ni a, SpaceX leh Blue Origin lam pawhin lander siam hna an thawk mek bawk a ni.