NASA thlawhna lian WB-57 chu Thawhlehni zing khan Houston-a Ellington Field-ah hmanhmawh taka tum a ngai ta a. He thlawhna hian a tumna hmanrua (landing gear) a hman theih loh avangin a pumpui (belly) hmangin tumhmunah hian a rawn inhnawt thla a ni. Video hmuh tur awmah chuan thlawhna hian a tumna hmun a thlen hnuah pilot-in thiam takin a thunun a, a rawn tawlh thla hnek hnek lai hmuh tur a awm a, him takin a tum pui thei a ni.
NASA thupuangtu Bethany Stevens chuan he thilah hian tumah hliam tuar an awm lo tih a sawi a. ‘Vawiin hian mechanical harsatna vangin kan WB-57 pakhat chu Ellington Field-ah a pumpui hmangin a tum a ngai a. Tunah hian thil thlen dan kan enfiah mek a, thlawhnaa chuang zawng zawngte pawh an him e,’ tiin a sawi. He thlawhna hian harsatna a neih chhan hi NASA chuan uluk takin an enfiah zui dawn a, thudik an hriat veleh mipui hnenah an puangzar leh dawn a ni.
He thlawhna line hi kum 1944 atang tawha British-te siam tan a ni a. United States Air Force chuan kum 1951 hnu lamah khan an thlawhna hlui thlak nan an lo hmang tan a ni. Chutih laiin, kum 1972 atang khan NASA chuan science lama zir chianna hrang hrang atan a hmang tan a. Thlifui lian (hurricanes) chungah te thlawkin boruak zir chian nan te leh van-thei-ni (comets) atanga vut lo tla te lakhawm turin boruak sang takah an thlawk thin a ni.
Tun hnaiah he thlawhna hi SpaceX Starship thlawh chhuah lai thlir nan te an hmang a, Artemis II lunar mission-a thil zir chian nan pawh hman an lo tum lawk tawh a ni. Mahse, he thlawhna chhe ta hi siam that leh theih a nih leh nih loh erawh hriat a la ni rih lo. NASA hian hetiang thlawhna hi pathum chauh an neih avangin, pakhat a chhiat hian an hna tam tak a suk-thlek phah thei a, thla (Moon) vela zir chianna an neih mekah nghawng a neih leh neih loh chu an la sawi thei rih lo a ni.