World number two Nelly Korda chuan golf khawvel tana thil hmasawnna thleng thei tur, mipa leh hmeichhe inkhelh ho theihna hun tha chu hmaih a ni tih a sawi chhuak. Tiger Woods leh Rory McIlroy-ten an hruai, virtual golf league thar ‘TGL’ leh hmeichhe tana ‘WTGL’ an din hrang tlat chu ‘unbelievable miss’ (hmaih pawi tak) a nih thu a sawi a, he thil hian golf boruak a vawrh thui thei hle tura a ngaih thu a tarlang.
WTGL hi Florida-a SoFi Center-ah khelh a ni dawn a, hei hi mipa khelhna hmun tho a ni. Khawvela hmeichhe golf thiam ber berte chu team matchplay-ah an inel dawn a, mahse Korda chuan mipa nena khelh ho loh chu pawi a tih thu a sawi a ni. ‘He thil hi ka rilru a buai deuh a, hmeichhe dangin an sawi ve lo hi mak ka ti hle a ni. Mipa nena hmun khata kan khel ho lo hi hmaih pawi tak a ni,’ tiin a lungawi lohna a sawi chhuak.
Korda chuan mipa leh hmeichhia hmun khata inelna hi golf tihhmasawnna kawng tha ber a nih thu a sawi a. Hetiang hi lo thleng ta se, mipa leh hmeichhia hmun khata intluk taka an inel hmasakna ber leh lawmman pawh inzat an hmuhna hmasa ber a nih tur thu a tarlang. ‘Hemi aia golf tihhmasawnna kawng tha hi a awm leh chuang lo ang,’ tiin a sawi belh bawk. Mahse, hetiang hun tha hmeichhe tan an siam ve hrim hrim chu thil lawmawm tak a nih thu a sawi tel tho a ni.
TGL dintu Mike McCarley chuan mipa leh hmeichhe khelh ho tur chungchang hi sawi ho tawh a nih thu a sawi a. ‘Hei hi kan ngaihven hle a, LPGA leh player dangte pawh hian an ngaihven viau a ni,’ tiin a sawi. Mahse, tunah rih chuan TGL leh WTGL kalpui phawt chu an thupui ber a nih thu a tarlang. Korda hi kum 27 mi a ni a, he inelnaa tel tur hian a hun neih dan a la en kual mek a ni. World number one Jeeno Thitikul leh Charley Hull-te erawh he inelnaa tel tur hian an hming an pe tawh a ni.