Newcastle United chuan Champions League-a Paris St-Germain (PSG) an hmachhawn hma hian mual pawna (away) an khelh chhiat ṭhinna siamṭhat tumin hma an la mek a. Eddie Howe-a naute hian kumin season-ah mual pawnah harsatna nasa tak an nei a, tun hnai inkhelah pawh Wolves nena mual pawna an inkhelhin goal khat pawh an thun thei lo a ni. Hei hi an hmachhawn tur hmasa chu defending champions PSG an nih avangin an tan fiahna lian tak a ni dawn a ni.
Statistics thlir hian, Newcastle hian kumin season-ah mual pawnah vawi thum chauh hnehna an la chang a. St James’ Park-a an khelh hian an win rate hi 62% a nih laiin, mual pawnah erawh 21% chauh a ni thung. An home-a mipui au thawm hian nasa takin a pui ṭhin tih an player-te pawhin an sawi a, mahse Parc des Princes, Anfield leh Etihad Stadium ang hmun hlauhawm zawka an inkhelh a ngaih dawn avangin mual pawna an rilru put hmang hi an thlak a ngai hle a ni.
Goal thun lamah pawh Newcastle hi mual pawnah an tlu chhia a, Premier League-a mual pawna goal thun tlem pawl an ni mek. Alexander Isak-a’n Liverpool a pan hnu khan Newcastle hian an striker hlui ‘movement’ leh counter-attack-a hmawr bawk thiamna kha an la ngai hle tih a lang chiang. Anthony Gordon, Nick Woltemade leh Harvey Barnes-te pawhin mual pawnah goal thun an harsat hle a, mual chhunga an khelh dan hi an thlak a nih loh chuan Champions League-a hmasawn zel a harsa dawn niin a lang.
Eddie Howe chuan a player-te chu inkhelh an neihna hmun vanga rilru tih hnual lo tur leh, hmachhawn tur apiang beih let ve mai turin a chah a ni. ‘A chang chuan inkhel a len poh leh, a challenge a san poh leh kan tan ṭhat leh zual a ngai ṭhin,’ tiin Howe chuan a sawi. PSG lakah hian an ‘resilience’ leh ‘quality’ vawng nung thei turin an inbuatsaih a, mual pawna fiahna hmachhawn thei tura an inrintawkna vawng nung turin zanin inkhel hi a pawimawh hle dawn a ni.