Northern Ireland chu United Kingdom-a hmun hmasa ber niin, driver thar leh naupang zawk te tan ‘graduated driver licensing’ (GDL) an tih chu hman tan a ni dawn ta. He dan thar hi kum 70 chhunga lirthei khalh dan chungchanga inthlak danglamna nasa ber nia sawi a ni a, kawngpuia thihna thlen thei chetsualna, a bik takin driver naupang zawk te vanga thleng thin chu tihlem tura duan a ni.
He dan thar, October thla atanga hman tan tur hian kum 17 leh 23 inkar a bitum bik a, motor khalh an zir dan kawngah nasa takin a thlak danglam dawn a ni. Driver license nei thar turte chuan test an pek hmain thla ruk zet ‘learner’ angin an awm hmasa tawh tur a ni a, hei bakah hian zan lama lirthei khalh chungchangah leh motor-a mi phurh theih zat chungchangah pawh khuahkhirhna thar a awm bawk dawn a ni.
Infrastructure Minister Liz Kimmins chuan he inthlak danglamna hi kawngpuia thihna leh hliam tuar hnem ber tura lang driver naupang zawk te humhimna tura siam a nih thu a sawi. Kum 2024 chhung khan Northern Ireland kawngpuiah driver kum 17-23 inkar vanga chetsualna avangin mi 164 in nunna an hlohin hliam na tak an tuar a ni. He kum inkar driver-te hian license neitu zawng zawng 8% chauh ni mah se, chetsualna thleng 24% lai hi anmahni vanga thleng a ni tih tarlan a ni bawk.
Dan thar hnuaiah hian, driver thar te chuan thla ruk chhung motor khalh an zir hmasat hnuah chauh test an pe thei dawn a, he thla ruk chhung hian module 14 zet an zir chhuak tur a ni. Chutiang bawkin, test an pass hnu pawhin ‘R’ plate tar a ngaih hun chhung chu thla 12 atangin thla 24-ah tihsei a ni a. Zan dar 11 leh zing dar 6 inkarah driver kum 24 hnuai lamte chuan mi pakhat (kum 14-20 inkar) chauh an phur thei tawh dawn a ni. Amaherawhchu, tuna speed limit 45mph-a khuahkhirhna awm mek chu hlih a ni thung dawn a ni.