Northern Ireland-a primary school zirtirtu Javed Love-a chuan kum 40 zet hman tawh dan, ‘conscience clause’ hmangin sakhaw zirtirna (Religious Education - RE) leh school-a sakhaw inkhawmna (collective worship) te tel tawh lo turin thutlukna a siam a. He hma lakna hi Northern Ireland-ah chuan kum 10 chuang chhunga zirtirtu zinga hetiang ti hmasa ber a ni a, he thil hian ramin sakhaw zirtirna a kalpui dan chungchangah sawihona nasa tak a chawk chhuak leh a ni.
Love-a hian ‘Education and Libraries (Northern Ireland) Order 1986’ hnuaia Article 22-na a hmang a ni. He dan hian zirtirtute chu an chhia leh tha hriatna (conscience) avangin sakhaw zirtirna atanga inhnuhdawh theihna zalenna a pe a. BBC News NI hnenah a sawi danin, ani hi Kristian sakhua do a nih loh thu leh, Kristianna chungchang zirtir chu harsatna a neih loh thu a sawi a, mahse tun dinhmunah chuan thlirna thupui pakhat chauh (Christian-centric) tarchhuah a nih avangin naupang kum 6 leh 7 mi lek tan sakhaw hrang hrangte dinhmun hriatthiam a harsa hle niin a sawi.
Tun hnai khan UK Supreme Court chuan Northern Ireland school-a sakhaw zirtirna kalphung chu ‘unlawful’ (dan kalh) a nih thu a lo puang tawh a. Court chuan sakhaw zirtirna hi tlangpui leh huapzo (objective, critical, and pluralistic) a nih loh chuan naupangte thluak hrukna (indoctrination) anga ngaih theih a nih thu a lo sawi tawh a ni. Javed Love-a hian Supreme Court thutlukna hi a case nena inzawm chiah lo mah se, zirtirna huapzo zawk a awm a nih chuan sakhaw zirtirna hi ‘100%’ a zirtir leh duh tur thu a sawi bawk.
Javed Love-a hian sakhaw zirtirna hunah midang a class a lak tir a, chu mi aiawn chuan subject dang a lo zirtir thung a ni. Northern Ireland Humanists te chuan zirtirtute hian hetianga inhnuhdawh theihna dan hi an hre vak lo tih an sawi a. He thil hian ramin zirna kalphung, a bik takin sakhaw zirtirna kawngah siamthat (reform) a mamawh zia a tarlang a. Education Minister Paul Givan pawhin sakhaw zirtirna syllabus chu ennawn a, siamrem a nih tur thu a lo sawi tawh a ni.