Nigeria petroleum minister hlui, Diezani Alison-Madueke-i’n eiruna a sum hmuh hmangin London-ah nawmsakna a lo chen thin dan chu court-ah tarlan a ni. Southwark Crown Court-a thubuai ngaihtuah a nih lai hian, Alison-Madueke-i hian Harrods-ah pound maktaduai 2 zet a hman thu sawi a ni a. He sum hi ama sum ni lovin, contract hlawk tak tak beiseitu business-man-te hman sak a ni tih tarlan a ni.
Alison-Madueke-i, kum 65-a upa hian kum 2010 leh 2015 inkhan President Goodluck Jonathan-a hnuaiah petroleum minister hna a lo thawk tawh a. He hun chhung hian UK-ah nawmsakna tinreng—in hrang hrang, private jet, chauffeur leh pound 1,00,000 zet cash-a dawnte a lo nei tawh thin a ni. Southwark Crown Court-a prosecutor Alexandra Healy KC chuan he thubuai hi Nigeria-a oil leh gas industry-a eiruna thleng chungchang a nih thu a sawi.
Juror-te hnenah tarlan a nih danin, Alison-Madueke-i hian Harrods-ah a thil lei nan Nigerian businessman Kolawole Aluko-a payment card-te a hmang thin a. He hmunah hian personal shopper bik a nei hial a, chu chu Harrods Rewards Black Tier member, kum khata pound 10,000 chuang hmang thinte chauh neih theih a ni. Chu bakah hian, Buckinghamshire leh London-a a in-te siam that nan pound maktaduai 4.6 zet hman a ni bawk.
Alison-Madueke-i bakah hian a unaupa, archbishop hlui Doye Agama leh oil industry executive Olatimbo Ayinde-te pawh eiruna thubuai hrang hrang siamsak an ni a. Mahse, an vai hian thiam loh an chan thu an pha vek a ni. He thubuai hi kar 12 chhung zet ngaihtuah tura ruahman a ni a, khawvel pumpui sumdawnna tibuai thei eiruna a nih avangin UK court hian ngaihtuah chu an mawhphurhna a nih thu prosecutor chuan a sawi bawk a ni.