Pornhub chuan karkat thar atangin United Kingdom (UK) chhunga an website luh theihna an dan (restrict) tur thu an puang a. Hei hi UK sorkarin pornographic website-te laka naupangte an him theih nana ‘Online Safety Act’ hnuaia age verification (kum enfiahna) khauh tak a hman tak vang a ni. February ni 2 atang chuan, he website-a account nei sa tawh chauh lo chuan tlawh theih a ni tawh dawn lo a ni.
Pornhub neitu company, Aylo chuan he dan thar hian a thiltum tak ‘naupangte venna’ chu a hlawhtling lo hle niin an sawi a. Age verification khauh lutuk hman a nih avang hian tlawhtu tam tak chu internet hmun thim leh him lo zawk, danin a thunun lohna (unregulated) lamah an tawlh luh phah zawk niin an sawi bawk. Nikum October thla khan, Aylo chuan he dan thar vanga an website tlawhtu zat chu 77% laiin a tlahniam tawh tih an lo sawi tawh a ni.
UK-a internet enkawltu (regulator), Ofcom thupuangtu chuan porn site-te hian duh thlan tur pahnih - age verification hman emaw, UK-a luh theih loha an site block emaw an nei tih a sawi. Aylo hruaitu Alex Kekesi erawh chuan he thutlukna hi siam harsa an tih thu sawiin, ‘Kan site-te hi dan hnuaia awm leh enkawl uluk tak an ni a, mahse UK-ah tlawh theih an nih tawh dawn loh laiin, mahni thu thua awm site tam tak erawh awlsam takin an la tlawh theih dawn a ni,’ tiin a lungawilohna a tarlang.
Cyber security lama thiamna nei Chelsea Jarvie chuan naupangte venna kawngah hian ‘silver bullet’ emaw kawng awlsam tak pakhat chauh a awm lo tih a sawi a. VPN hman hian heng dan siamte hi a paltlang theih reng avangin, naupangte venna atan chuan kawng hrang hrang (layered controls) hman a ngai a ni tih a tarlang. Pornhub mai bakah hian Aylo site dang, YouPorn leh Redtube-te pawh he hrekna hian a huam tel dawn a ni.